ލ. މާންދޫން ކޮވިޑް-19 އަށް ޕޮޒިޓިވްވި 3 މީހަކު ހާލު ދެރަވެ، މާލެ ގެނެސްފިއެވެ.
ލ.ގަން ރީޖަނަލް ހޮސްޕިޓަލުން ބުނީ އެ ތިން މީހުން މާލެ ފޮނުވާލާފައިވަނީ ރޭގެ ވަގުތެއްގައި ކަމަށެވެ.
އެގޮތުން ރޭ މާލެ ފޮނުވައިލެވުނީ ސްރީލަންކާގެ ފިރިހެނަކާއި ނޭޕާލް ގެ ދެ ފިރިހެނުން ކަމަށް އެ ހޮސްޕިޓަލުން ވަނީ ބުނެފައެވެ.
ގަމު ރީޖަނަލް ހޮސްޕިޓަލުން އާންމުކުރި މައުލޫމާތުން ދައްކާގޮތުގައި މިހާތަނަށް 1166 ސާމްޕަލްއެއް ވަނީ ނަގާފައެވެ. އޭގެ ތެރެއިން މިހާތަނަށް 259 މީހަކު ޕޮޒިޓިވްވި އިރު، 234 ސާމްޕަލްގެ ނަތީޖާ އަދި ނުލިބޭ ކަމަށް އެހޮސްޕިޓަލުން ބުނެއެވެ.
މާންދޫ މޮނީޓަރިންގެ ހާލަތަށް ލާފައިވަނީ މިމަހު 23 ވަނަ ދުވަހުއެވެ.
އެރަށް މޮނީޓަރިންގެ ހާލަތަށް ލާފައިވަނީ ކޮވިޑްގެ އަލާމާތްތައް ހުރި ކަމަށް ޝައްކު ކުރެވިގެން މާންދޫ ފިޝަރީޒް ކޮމްޕްލެކްސް ގައި މަސައްކަތް ކުރާ ބައެއް މީހުންގެ ސާމްޕަލް ޓެސްޓް ކުރުމުން ޓެސްޓުކުރި އެންމެންވެސް ކޮވިޑަށް ޕޮޒިޓިވްވުމާ ގުޅިގެންނެވެ.
ފާއިތުވި މަސް ތެރޭގައި ރަށްރަށުން ފެންނަ ކޮވިޑް ކޭސްތައް ބޮޑުތަނުން އިތުރު ވެފައި ވާ ކަން އެޗްޕީއޭގެ ތަފާސް ހިސާބުތަކުން ދައްކައެވެ. އަތޮޅުތެރޭގެ ބައެއް ރަށްތަކުން ރެންޑަމް ސާމްޕަލްތައް ވެސް ދަނީ ޕޮޒިޓިވް ވަމުންނެވެ.
އެގޮތުން، ބައެއް ރަށްރަށުން މީހަކު ޕޮޒިޓިވް ކަން އެނގޭއިރު، ރަށުގައި ބަލި ފެތުރި، ރަށުގެ ގިނަ ބަޔަކަށް ބަލި ޖެހިފައި ވެސް އެބަ ހުއްޓެވެ. ބައެއް ފަހަރު އެ ކޭސްތަކަކީ ކަރަންޓީނު ވާ މީހުންނާ ގުޅުން ހުރި ކޭސްތަކަށް ވެސް ވެއެވެ.
