ޕޮޒިޓިވް ކޭސްއަކާ ގުޅިގެން އައްޑޫ ސިޓީ މޮނިޓަރިން ހާލަތަށް ގެނެސްފިއެވެ.
އައްޑޫ ސިޓީ މޮނިޓަރިން ހާލަތަށް ގެނެސްފައިވަނީ އައްޑޫ އިކުއިޓޯރިއަލް ހޮސްޕިޓަލު (އޭއީއެޗް)ގެ ފްލޫ ކްލިނިކަށް ދެއްކި މީހަކު ކޮވިޑު-19 އަށް ޕޮޒިޓިވްވުމާ ގުޅިގެންނެވެ.
އެ ކޭސް އާ ގުޅިގެން ކޮންޓެކްޓް ޓްރޭސިންގެ މަސައްކަތް ނިމެންދެން އައްޑޫ ސިޓީ މޮނިޓަރިންގެ ހާލަތަށް ގެނެސްފައިވާ ކަމަށް އެޗްޕީއޭއިން ވަނީ ބުނެފައެވެ.
މައުލޫމާތު ލިބިފައިވާ ގޮތުގައި ޕޮޒިޓިވްވީ މީހާ އާ ގިނަ ބަޔަކު ކޮންޓެކްޓު ވެފައި ވާއިރު އޭގެ ތެރޭގައި އައްޑޫގެ ގުޅިފައިވާ ރަށްތަކުގެ މީހުންވެސް ހިމެނެއެވެ.
ދުވަހުން ދުވަހަށް ޕޮޒިޓިވް ކޭސްތައް އިތުރުވަމުން ދާ އިރު މީހުން ދިރިއުޅޭ ރަށްރަށުން ވެސް ޕޮޒިޓިވް ކޭސްތައް ފެންނަ މިންވަރު އިތުރު ވެއްޖެއެވެ.
އެގޮތުން އިއްޔެ 3305 ސާމްޕަލެއް ޓެސްޓް ކޮށްފައި ވާއިރު، 465 މީހަކު ކޮވިޑަށް ޕޮޒިޓިވްވެފައެވެ.
އިއްޔެ ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވް ވި 193 މީހަކާއި، ހިންގަމުން ދާ ރިސޯޓުތަކުން 25 މީހަކާއި މީހުން ދިރިއުޅޭ ރަށްރަށުން ޕޮޒިޓިވްވި 242 މީހަކާއި ލިވަ ބޯޑުން 5 މީހެކެވެ.
