އަތޮޅުތެރޭގެ ރަށްތަކުގައި ކޮވިޑް-19 އަށް ޕޮޒިޓިވް ވެފައި މިވަގުތު ތިބި މީހުންގެ އަދަދު 1000 އަށް ވުރެ މައްޗަށް އަރާފިއެވެ.
އެޗްޕީގޭ ތަފާސްހިސާބުތަކުން ދައްކާ ގޮތުގައި މިވަގުތު ޖުމްލަ 64 ރަށެއްގައި ކޮވިޑް އެކްޓިވް ޖެހިފައި ތިބި މީހުން އެބަތިއްބެވެ. އެ ރަށްތަކުން ޖުމްލަ 1060 ދިވެހިން އަދި 289 ބިދޭސީންނަށް ވަނީ ކޮވިޑް ޖެހިފައެވެ. އެއީ ޖުމްލަ 1349 މީހުންނެވެ. ހަމައެއާއެކު 20 ރަށެއް ވަނީ މޮނިޓަރުންގެ ހާލަތުގައެވެ.
ގިނަ ކޭސްތައް ފެނިފައި ވާ ރަށްތައް:
- ކ. މާފުށި (2 ފުރަބަންދު، 125 ކޮންޓެކްޓުން، 85 ފްލޫ، 39 ޑިޕާޗާ، 14 ރެންޑަމް )
- އއ. މަތިވެރި (1 ފުރަބަންދު، 169 ކޮންޓެކްޓުން، 10 ފްލޫ، 1 ޑިޕާޗާ )
- ޅ. ނައިފަރު ( 165 ކޮންޓެކްޓުން )
- ބ. އޭދަފުށި (41 ރެންޑަމް، 70 ކޮންޓެކްޓުން، ފުލޫ 17 )
- ތ. ވޭމަންޑޫ (112 ކޮންޓެކްޓް)
އަތޮޅުތެރޭގެ ރަށްރަށުގައި ޖުމްލަ 1349 އެކްޓިވް ކޭސް އުޅޭއިރު މީގެ ތެރެއިން ކޮވިޑް ފެސިލިޓީތަކުގައި ފަރުވާ ދެމުން ދަނީ އެކަކަށެވެ. އެއީ ބ އަތޮޅު ކޮވިޑް ފެސިލިޓީގައި ފަރުވާ ދެމުން ދާ މީހެކެވެ.
ދުވަހުން ދުވަހަށް ޕޮޒިޓިވް ކޭސްތައް އިތުރުވަމުން ދާއިރު މީހުން ދިރިއުޅޭ ރަށްރަށުން ވެސް ޕޮޒިޓިވް ކޭސްތައް ފެންނަ މިންވަރު އިތުރު ވެއްޖެއެވެ.
އިއްޔެ 2،556 ސާމްޕަލްއެއް ޓެސްޓްކޮށްފައިވާއިރު، އޭގެތެރެއިން 318 މީހުން ވަނީ ކޮވިޑަށް ޕޮޒިޓިވްވެފައެވެ. އިއްޔެ ޕޮޒިޓިވްވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 142 މީހަކާއި، މީހުން ދިރިއުޅޭ ރަށްރަށުން ޕޮޒިޓިވްވި 130 މީހަކާއި، ރިސޯޓްތަކުން 33 މީހަކާއި، ހަދަމުންދާ ރަށަކުން އެކަކު އަދި ސިނާއީ މަސައްކަތަށް ދޫކޮށްފައިވާ ރަށްރަށުން 4 މީހެކެވެ.
މިހަފްތާ އަދި މިދިޔަ ހަފްތާގައި ވެސް ކޮވިޑް ކޭސްތައް ވަނީ އިތުރުވެފައެވެ. އެގޮތުން މިދިޔަ ބުދަ ދުވަހު ރ 464 މީހުން ކޮވިޑަށް ޕޮޒިޓިވްވެފައިވާއިރު އަންގާރަ ދުވަހު ވަނީ 386 މީހަކު ކޮވިޑަށް ޕޮޒިޓިވް ވެފައެވެ. މިދިޔަ ހޯމަ ދުވަހު 328 މީހަކު ކޮވިޑް ޕޮޒިޓިވް ކޭސް ރިޕޯޓް ކޮށްފަ ވާއިރު އާދީއްތަ ދުވަހު ވަނީ 253 ކޭސް ރިޕޯޓް ކޮށްފައެވެ. ހަމައެއާއެކު ހޮނިހިރު ދުވަހު ވަނީ 218 ކޭސް ރިޕޯޓް ކޮށްފައެވެ.
