ފުލުހުންގެ ބެލުމުގެ ދަށުގައި އޮންނަ ކ. ދޫނިދޫން 14 މީހަކު ކޮވިޑް-19 އަށް ޕޮޒިޓިވްވެއްޖެއެވެ.
އެޗްޕީއޭގެ ތަފާސް ހިސާބުތަކުން ދައްކާ ގޮތުގައި އިއްޔެ ސިނާއީ ރަށަކުން 17 މީހަކު ވަނީ ޕޮޒިޓިވްވެފައެވެ. އޭގެ ތެރެއިން 13 މީހުން ޕޮޒިޓިވްވެފައިވަނީ ދޫނިދޫން ކަމަށް އެޗްޕީއޭއިން ބުނެއެވެ.
މި ކޭސްތަކާ ގުޅިގެން ކޮންޓެކްޓް ޓްރޭސިންގެ މަސައްކަތް ކުރަމުން އަންނަ ކަަމަށް ވެސް އެެޗްޕީއޭއިން ވަނީ ބުނެފައެވެ.
ދޫނިދޫގައި ކޮވިޑް ކޭސްތައް ފެނުމާ ގުޅިގެން ބާ ކައުންސިލުން ކުރި ޓުވީޓެއްގައި ބުނީ ދޫނިދޫން ކޮވިޑް-19 ގެ ކޭސްތަކެއް ފެނިފައިވާތީ ޖަލު ބަންދުގައި ތިބި މީހުންގެ ވަކީލުން އެމީހުންނާއި ބައްދަލު ކުރުމުގައި އެޗްޕީއޭގެ ގައިޑްލައިނަށް އަމަލު ކުރުމަށް އިލްތިމާސް ކުރާ ކަމަށެވެ.
ދޫނިދޫން ބަޔަކު ކޮވިޑަށް ޕޮޒިޓިވްވި ނަމަވެސް އެރަށް އަދި މޮނިޓަރިންގެ ހާލަތައް ގެނެސްފައެއް ނުވެއެވެ.
ކޮވިޑް ކޭސްތަކެއް ފެނިގެން މިހާރު އަތޮޅު ތެރޭގެ 18 ރަށެއް ވަނީ މޮނިޓަރިންގެ ހާލަތުގައެވެ. އޭގެތެރޭގައި ތ. އަތޮޅުން 7 ރަށް މޮނިޓަރިންއަށް ލާފައެވެ. އެއީ ތިމަރަފުށީގެ އިތުރުން، ގާދިއްފުށި، މަޑިފުށި، އޮމަދޫ، ކިނިބިދޫ، ވޭމަންޑޫ، އަދި ވިލިފުއްޓެވެ.
މީގެ އިތުރުން މޮނިޓަރިންގައި ހުރި ރަށްރަށަކީ ކ. އަތޮޅުން ހުރާ އާއި ހިންމަފުށި، މާފުށި، ގުޅި، ދިއްފުށު، ޅ. އަތޮޅުން ނައިފަރާއި ފެލިވަރާއި ހިންނަވަރު، އދ. އަތޮޅުން މާމިނގިލި، ބ. އޭދަފުށި، އއ. ބޮޑުފޮޅުދޫ އާއި މަތިވެރިއެވެ.
