އެމްއެމްޕީއާރްސީ ހިޔާނާތުގެ މައްސަލައިގައި ޖަލު ހުކުމެއް ތަންފީޒު ކުރައްވަމުން ގެންދަވާ އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލާ އިދިކޮޅު ކޯލިޝަންގެ ސަޕޯޓަރުން މަގުމައްޗަށް ނިކުމެ އިހުތިޖާޖު ފަށައިފިއެވެ.
ޕީޕީއެމް އޮފީސް ހިމެނޭ ސަރަހައްދުގައި ބޮޑު ތަކުރުފާނު މަގުން ފަށައިގެން ކުރިއަށްގެންދާ އެ އިހުތިޖާޖުގައި އިދިކޮޅު ދެ ޕާޓީގެ އިސް ބޭފުޅުންނާއި ރައްޔިތުންގެ މަޖިލީހުގެ މެންބަރުންނާއި އާންމުން ދަނީ ބައިވެރިވަމުންނެވެ. އިހުތިޖާޖުގެ ބައިވެރިން ތިބީ ރައީސް ޔާމީންގެ މޫނު ސިފަކޮށްދޭ މާސްކު އަޅައިގެންނެވެ.
ކޯލިޝަން ހިންގެވުމުގައި އިސްކޮށް ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ރައްޔިތުން މަގުތަކަށް ނިކުނަން ޖެހުނީ ރައީސް ޔާމީނަށް ނުހައްގުން އަނިޔާ ދެމުންދާތީ ކަންބޮޑުވެގެން ކެތްނުކުރެވިގެން ކަމަށާއި އިހުތިޖާޖުގެ ބައިވެރިން ރައީސް ޔާމީންގެ މޫނުފުޅު ސިފަވާ މާސްކު އަޅައިގެން ތިބީ އެމަނިކުފާނުގެ ހިދުމަތުގެ އަގު ވަޒަންކޮށް އެމަނިކުފާނުގެ ހަނދާން އައުކުރުމުގެ ގޮތުން ކަމަށެވެ.
އެ އެއްވުމާ ގުޅިގެން ޕީޕީއެމް އޮފީސް ހުންނަ ސަރަހައްދު ބަންދު ވަނީ ކޮށްފައެވެ. އެގޮތުން ބޮޑުތަކުރުފާނު މަގުގެ ބައެއް ބަންދުކޮށްފައި ވާއިރު، ފުލުހުން ދަނީ ބެރިކޭޑް ޖަހައިގެން އެ ސަރަހައްދަށް ނުވަދެވޭ ގޮތަށް މީހުން ހުއްޓުވަމުންނެވެ.
ރައީސް ޔާމީން ޖަލުގައި ހުންނަވާތާ މިއަދަށް 500 ދުވަސް ވެފައި ވާއިރު، މަނީ ލޯންޑަރިންގެ ކުށް ސާބިތުވެ، ރައީސް ޔާމީންގެ މައްޗަށް ކްރިމިނަލް ކޯޓުން ހުކުމް އިއްވީ 2019 ވަނަ އަހަރުގެ ނޮވެމްބަރު މަހުއެވެ. އެމަނިކުފާނުގެ މައްޗަށް 5 އަހަަރުގެ ދުވަހުގެ ޖަލު ހުކުމެއް އިއްވުމާއެކު 5 މިލިއަން ޑޮލަރުން ޖޫރިމަނާ ކުރުމަށް ކްރިމިނަލް ކޯޓުން ވަނީ ހުކުމް ކޮށްފައެވެ.
ޔާމީންގެ މައްޗަށް އިތުރު މައްސަލައެއްގައި ވެސް ވަނީ މަނީ ލޯންޑްރިންގެ ދައުވާ އުފުލައި ކުރިމިނަލް ކޯޓުގައި ޝަރީއަތް ފަށާފައެވެ. އެއީ، ރިސޯޓް ހެދުމަށް ދޫކުރި މުއާމަލާތުން މަގާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯދެއްވި ކަމުގެ ތުހުމަތު ކުރާ މައްސަލައެކެވެ.
