ތ. ވޭމަންޑޫ ކްލާސްޓާއިން ކޮވިޑް-19 އަށް ޕޮޒިޓިވްވި މީހުންގެ އަދަދު 53 އަށް އަރައިފިއެވެ.
ތ. އަތޮޅު ހޮސްޕިޓަލުން އާންމުކޮށްފައިވާ އެންމެ ފަހުގެ މައުލޫމާތު ތަކަށް ބަލާއިރު އިއްޔެ ވަނީ 10 މީހަކު ކޮވިޑަށް ޕޮޒިޓިވް ވެފައެވެ. ޕޮޒިޓިވްވި މީހުންގެ ތެރެއިން 48 މީހަކު ރަށުގައި ތިބިއިރު އެކަކު ވަނީ ފެސިލިޓީއަށް ބަދަލުކޮށްފައެވެ.
މި ކޭސްތަކާ ގުޅިގެން މިހާތަނަށް ވޭމަންޑޫގެ 104 ގެއެއް ވަނީ މޮނީޓަރިންއަށް ލާފައެވެ.
ވޭމަންޑޫ މޮނީޓަރިން ހާލަތަށް ލާފައިވަނީ މިމަހު 9 ވަނަ ދުވަހު އެ ރަށު އަތޮޅު ހޮސްޕިޓަލްގައި ފަރުވާ ދިނުމަށް ފަހު އިތުރުފަރުވާއަށް މާލެ ގެންދިޔަ ދެ މީހަކު ޕޮޒިޓިވްވުމާ ގުޅިގެންނެވެ. އެއީ އުމުރުން ދުވަސްވީ އަންހެނަކާއި ޒުވާން އަންހެނެކެވެ.
އޭގެ ތެރެއިން އުމުރުން ދުވަސްވީ މީހާ ވަނީ އިއްޔެ މަރުވެފައެވެ. އޭނާ މަރުވެފައި ވަނީ ދަރުމަވަންތަ ހޮސްޕިޓަލްގެ ޑީއެޗް11ގައި އެޑްމިޓްކޮށްގެން ފަރުވާދެމުން ދަނިކޮށް ކަމަށް ވެސް އެޗްޕީއޭއިން މައުލޫމާތު ދެއެވެ.
ވޭމަންޑޫ ކްލާސްޓާ އާ ގުޅިގެން ތ އަތޮޅުގެ ހަ ރަށެއް މިހާރު ވަނީ މޮނިޓަރިން އަށް ލާފައެވެ. އެއީ ވޭމަންޑޫ، ވިލުފުށި، ކިނބިދޫ، އޮމަދޫ، މަޑިފުށި އަދި ގާދިއްފުއްޓެވެ.
