މިއަދު ޖުމްލަ 241 މީހަަކު ކޮވިޑް-19 އަށް ޕޮޒިޓިވް ވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ބުނީ މިއަދު ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވް ވި 73 މީހަކާއި، ހިންގަމުން ދާ ރިސޯޓަކުން 15 މީހަކާއި މީހުން ދިރިއުޅޭ ރަށްރަށުން ޕޮޒިޓިވްވި 74 މީހަކާއި އިންޑަސްޓްރިއަލް ރަށްރަށުން 79 މީހުން ކަމަށެވެ.
މިއަދުގެ ކޮވިޑް އަޕްޑޭޓު:
- މިއަދު ޕޮޒިޓިވްވި އަދަދު: 241
- ހޮސްޕިޓަލުގައި އެޑްމިޓް ކޮށްފައި ވާ މީހުންގެ އަދަދު: 99
- ޕޮޒިޓިވްވި މީހުންގެ ޖުމްލަ އަދަދު: 24،079
- ކޮވިޑް އެކްޓިވް ކޭސް: 2849
- ބަލިން ރަނގަޅުވި މީހުންގެ ޖުމްލަ އަދަދު 21،155
- ކޮވިޑް މަރުގެ ޖުމްލަ އަދަދު: 67
މިއަދު މަރުވި މީހާއާއެކު ކޮވިޑް ބަލީގައި މިހާތަނަށް 67 މީހަކު ވަނީ މަރުވެފައެވެ. މި މަހުގެ ތެރޭގައި މި ބަލީގައި ވަނީ ފަސް މީހަކު މަރުވެފައެވެ.
ފުރަތަމަ މީހާ މަރުވެފައި ވަނީ މިމަހު ތިން ވަނަ ދުވަހެވެ. އެ މީހާ އަކީ މަރުވެފައި އޮއްވާ އައިޖީއެމްއެޗްއަށް ގެންދިޔަ ފަހުން ހެދި ކޮވިޑް ޓެސްޓުން ޕޮޒިޓިވް ކަން އެނގިފައިވާ މީހެކެވެ. އެއާއެކު އޭނާ މަރުވީ ކޮވިޑުގައި ކަމަށް އެޗްޕީއޭއިން ވަނީ ނިންމާފައެވެ. ދެވަނަ މީހާ މަރުވީ މިމަހު ހަތަރު ވަނަ ދުވަހެވެ. އެއީ ކޮވިޑް ޖެހިގެން ދަރުމަވަންތަ ހޮސްޕިޓަލުގެ އައިސީޔޫގައި ފަރުވާ ދެމުން ދިޔަ މީހެކެވެ.
މި މަހު ތިން ވަނަ މީހާ މަރުވީ 18 ވަނަ ދުވަހުއެވެ. އޭނާއަކީ ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި ފަރުވާ ދެމުން ދިޔަ އުމުރުން 79 އަހަރު އަންހެނެކެވެ. އަދި ހަތަރު ވަނަ މީހާ މިދިޔަ ހޮނިހިރު ދުވަހުގެ ރޭގެ ވަގުތެއް ގައެވެ. އެއީ އުމުރުން 66 އަހަރުގެ ދިވެހި ފިރިހެނެކެވެ. އެމީހާ އައިޖީއެމްއެޗަށް ގެންދިޔަ އިރުވެސް އެއްވެސް ހަރަކާތެއް ނެތެވެ.
