އެންޓި ކޮރަޕްޝަން ކޮމިޝަން (އޭސީސީ) އިން ބަލާ މައްސަލައެއްގެ ނަތީޖާ އަންނަ ގޮތަކުން، މެންބަރުން މަގާމުން ދުރުކުރަން އުޅުމަކީ މިނިވަން ކަމާއެކު މަސައްކަތް ކުރުމަށް އެޅޭ ހުރަހެއް ކަމަށް އޭސީސީގެ ރައީސް، މަރްޔަމް ޝިއުނާ ވިދާޅުވެއްޖެއެވެ.
ޝިއުނާ އެހެން ވިދާޅުވީ ވެންޓިލޭޓަރުގެ ކޮރަޕްޝަނުގެ މައްސަލައާއި ގުޅިގެން އޭސީސީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
އެގޮތުން ޝިއުނާ ވިދާޅުވީ މަގާމާ ހަވާލުވެވަޑައިގަތްތާ މިވީ މުއްދަތުގައި މައްސަލައެއްގެ ނަތީޖާއާ ގުޅިގެން އޭސީސީގެ މެންބަރުން މަގާމުން ދުރުކުރާނެ ކަމަށް މަޝްވަރާކޮށް، އިތުބާރު ނެތްކަމުގެ ވޯޓު ނެގުމަށް ވެސް މަޝްވަރާ ކޮށްފައިވާ ކަމަށެވެ. އަދި އެއީ ވަރަށް ހިތާމަ ކުރާ ކަމެއް ކަމަށާއި އެކަމުގެ ސަބަބުން މިނިވަން ކަމާއެކު މަސައްކަތް ކުރުމަށް ހުރަސް އެޅޭ ކަމަށް ޝީއުނާ ވަނީ ވިދާޅުވެފައެވެ.
ޝިއުނާ ވަނީ މަގާމުން އިސްތިއުފާން ދޭނެ ސަބަބެއް ފެނިއްޖެނަމަ އިސްތިއުފާދޭނެ ކަމަށް ވެސް ވިދާޅުވެފައެވެ.
ޝިއުނާ އެހެން ވިދާޅުފައިވާއިރު އޭސީސީގެ ރައީސް ކަމުގެ މަގާމުން އޭނާ ވަކިކުރަން އެމްޑީޕީ ޕީޖީ ގުރޫޕުން ވަނީ ވޯޓަށް އަހާފައެވެ. ޝިއުނާގެ އިތުބާރު ނެތް ކަމުގެ ވޯޓު ނަގަން ފެނޭތޯ އެމްޑީޕީގެ ޕީޖީ ގްރޫޕްގައި ނެގި ވޯޓުގައި ޝިއުނާ ވަކި ކުރަން ފެންނަ ކަމަށް ވޯޓު ދެއްވީ އެންމެ 13 މެމްބަރުންނެވެ.
ކޮވިޑް-19އާ ގުޅިގެން ގެންނަން ނިންމި ވެންޓިލޭޓަރުތައް ގެނައުމުގައި ކޮރަޕްޝަންގެ އަމަލުތައް ހިންގާފައި ވާ މައްސަލައިގެ ތަހުގީގު ކުރިއަށް ގެންދިއުމުގައި އިހުމާލުވެފައިވާ ކަމަށް ބުނެ ޝިއުނާގެ އިތުބާރު ނެތް ކަމުގެ ވޯޓު ނަގަން ޕީޖީ ގްރޫޕަށް ހުށަހެޅުއްވީ އިނގުރައިދޫ ދާއިރާގެ އެމްޑީޕީގެ މެންބަރު ހަސަން އަހުމަދު (ހަސަންޓޭ)އެވެ.
އެމްޑީޕީގެ ޕީޖީ ގްރޫޕްގެ ތެރޭގައި އެ ވޯޓު ނަގާފައިވަނީ ވެންޓިލޭޓަރުތައް ގެނައުމުގައި ކޮރަޕްޝަން ހިންގި މައްސަލައިގެ ތަހުގީގު ކުރިއަށް ގެންދިއުމުގައި އިހުމާލުވެފައިވާ ކަމަށް ބުނެ ޝިއުނާގެ އިތުބާރު ނެތް ކަމުގެ ވޯޓު ނަގަން މަޖިލީހުގެ ރައީސް މުހައްމަދު ނަޝީދު ގޮވާލައްވާފައި ވަނިކޮށެވެ.
