މި ފަހަކަށް އައިސް މެލޭޝިއާގެ ސިޔާސީ މަސްރަހަށް އައި ބަދަލުތަކަށް ބަލާއިރު، ޑިމޮކްރަސީގެ އަސާސްތައް ކޮންމެވެސް ވަރަކަށް ފޮހެވިގެން ގޮސްފައި ވާ ކަމަށް، އެ ގައުމުގެ އެންމެ ބޮޑު ސިޔާސީ ޕާޓީ ކަމަށްވާ ޔުނައިޓަޑް މެލޭޒް ނޭޝަނަލް އޯގަނައިޒޭޝަން (އުމްނޯ)ގެ ނައިބު ރައީސް، ދާތޫކް ސެރީ މުހައްމަދު ހަސަން ވިދާޅުވެއްޖެއެވެ.
މެލޭޝިއާގެ ޑިމޮކްރަސީ، ހަގީގަތުގައި އިހުނަށްވުރެ ވަރުގަދަ ވެފައި ރަނގަޅުވާން ޖެހޭ ކަމަށާ، ނަމަވެސް މި ފަހަކަށް އައިސް ފެނުނު ކަންކަމަށް ބަލާއިރު، ޑިމޮކްރަސީ ހީނަރު ވަމުން އަންނަ ކަމަށް އުމްނޯގެ ނައިބު ރައީސް ވިދާޅުވިއެވެ.
ގާނޫނު ހަދާ މަޖިލީހުގައި ހިމެނިވަޑައިގަންނަވާ ބައެއް މެންބަރުން ޒާތީ އަޒުމެއްގައި މަސައްކަތް ކުރެއްވުމާ، އަމިއްލައަށް ނިންމުންތައް ނިންމުމާ، ހިޔާލު ފާޅު ކުރުމުގެ މިނިވަންކަމަށް ފާރަލުމާ، ގާނޫނު ހަދާ މަޖިލީސް ސަސްޕެންޑް ކުރުން ފަދަ ކަންކަމަކީ މިކަމުގެ މިސާލުތަކެއް ކަމަށް އުމްނޯގެ ނައިބު ރައީސް ވަނީ ފާހަގަ ކުރައްވާފައެވެ.
މިއަދު އާންމު ކުރެއްވި ބަޔާނެއްގައި އޭނާ އިތުރަށް ވިދާޅުވީ، މެލޭޝިއާގެ ޑިމޮކްރަސީއަކީ، ތަރައްގީ ވަމުން އަންނަ ގައުމުތަކަށް މިސާލަކަށް ވާންޖެހޭ ނިޒާމެއް ކަމަށެވެ.
އުމްނޯގެ ނައިބު ރައީސް، މުހައްމަދު ވިދާޅުވީ، ފަހުން ފެންނަން ފެށި ބަދަލުތަކަކީ ކަންބޮޑުވާންޖެހޭ ބަދަލުތަކެއް ކަމަށެވެ. އަދި ޑިމޮކްރަސީގެ ދަރަނިވެރިކަމުން އަރައިގަންނަން ޖެހޭ ކަމަށްވެސް އޭނާ ވަނީ ސިފަކުރައްވާފައެވެ. އެމީހަކީ ވަޒީރެއް ކަމުގައި ވީ ނަމަވެސް ނުވަތަ އިދިކޮޅު މެންބަރަކަށް ވީ ނަމަވެސް ނުވަތަ އާންމު ރައްޔިތެއް ކަމުގައި ވީ ނަމަވެސް، މެލޭޝިއާގެ ކޮންމެ މީހަކީ އެ ގައުމުގައި ޑިމޮކްރަސީ ނަގަހައްޓާ، ކުރިއަރުވާނެ މީހަކަށް ވާން ޖެހޭ ކަމަށް މުހައްމަދު ވިދާޅުވިއެވެ.
ޑިމޮކްރަސީއަކީ އަމިއްލަ މުދަލެއް ނޫން ކަމަށާ، މި ފިކުރުގައި މަސައްކަތް ކޮށްފި ނަމަ، މެލޭޝިއާގައި އަނެއްކާވެސް ޑިމޮކްރަސީ ކުރިއަރާ ދާނެ ކަމަށްވެސް މުހައްމަދު ވަނީ ވިދާޅުވެފައެވެ.
ފާއިތުވީ ދެތިން އަހަރަށް ބަލާއިރު، މެލޭޝިއާގެ ސިޔާސީ މަސްރަހު ވަނީ އިންތިހާއަށް ހަލަބޮލިވެފައެވެ.
