ދިވެހިރާއްޖެއަކީ ބަންގްލަދޭޝް އިން ހާއްސަ މަގާމެއް ދޭ ގައުމެއް ކަމަށް، އެ ގައުމުން ދިވެހިރާއްޖެއަށް ކަނޑައަޅާފައި ހުންނަވާ ހައިކޮމިޝަނަރު ރިއާ އެޑްމިރަލް ނަޒްމުލް ހަސަން ވިދާޅުވެއްޖެއެވެ.
ބަންގްލަދޭޝްގެ ސަފީރު މިހެން ވިދާޅުވީ، ދިވެހިރާއްޖޭގެ ފޮރިން މިނިސްޓަރު ޢަބްދުﷲ ޝާހިދު އިސްކޮށް ހުންނަވައިގެން ބަންގްލަދޭޝްއަށް މިހާރު ރަސްމީ ދަތުރެއް ކުރައްވަމުންދާ ދިވެހި ވަފުދަށް މަރުހަބާ ވިދާޅުވެ، ބަންގްލަދެޝްގެ ދުވަހު ނޫހެއްގައި ޝާއިއު ކުރެއްވި ލިޔުއްވުމެއްގައެވެ.
އެގޮތުން، ބަންގްލަދޭޝްއަކީ ރާއްޖެއަށް ބޭނުންވާ ބިދޭސީ މަސައްކަތްތެރިންގެ ޑިމާންޑަށް އެންމެ ބޮޑަށް ކޭޓާ ކުރަމުން އަންނަ ގައުމުކަން، ސަފީރު ވަނީ ފާހަގަ ކުރައްވައެވެ.
ބަންގްލަދޭޝްއަށް ފުރާވަޑައިގަތުމުގެ ކުރިން މީޑިއާއަށް ދެއްވި ބަޔާނެއްގައި، ފޮރިން މިނިސްޓަރު ޝާހިދު ވެސް ވަނީ މިކަމަށް އިޝާރާތް ކުރައްވާފައެވެ. އަދި ހިއުމަން ރިސޯސް ޕްލޭސްމަންޓްއާ ގުޅޭ މުހިންމު ފަހުމް ނާމާ (އެމްއޯޔޫ)އެއްގައި މިދަތުރުގެ ތެރެއިން، ބަންގްލަދޭޝްއާއެކު ސޮއި ކުރައްވާނެކަން ކަންވެސް ފޮރިން މިނިސްޓަރު ވަނީ އިއުލާން ކުރައްވާފައެވެ.
އެއް ގައުމަކުން އަންނަ ބިދޭސީ މަސައްކަތްތެރިންގެ އަދަދު ކޮންޓްރޯލް ކުރުމަށް ދިވެހިރާއްޖެއިން އަމާޒު ހިފާފައި ވާ ކަން ފާހަގަ ކުރައްވަމުން ސަފީރު ވިދާޅުވީ، މިފަދަ ދަނޑިވަޅެއްގައި ވިޔަފާރީގެ ދާއިރާއިން ދޭދޭ ގުޅުންތައް އިތުރަށް ބަދަހި ކުރެވެން ހުރި ދާއިރާތައް ބެލުމަކީވެސް ދެ ގައުމަށް މުހިންމު ކަމެއް ކަމަށެވެ. އަދި ޕްރޮފެޝަނަލް ދާއިރާތަކަށް މަސައްކަތްތެރިން ކަނޑައެޅުމަށް ވިސްނުން ބަހައްޓަން ޖެހޭ ކަމަށްވެސް ސަފީރު ވަނީ އިޝާރާތް ކުރައްވާފައެވެ.
ބަންގްލަދޭޝްއިން ރާއްޖެއަށް ކަނޑައަޅާފައި ހުންނަވާ ސަފީރު ވަނީ، ދިވެހިރާއްޖެއާއި ބަންގްލަދޭޝްއާއި ދިވެހިރާއްޖެއާއި ދެމެދު ސީދާ ޝިޕިންގް ލިންކު ގާއިމު ކުރުމާއި، ވިޔަފާރިއަށް ހުރި ބައެއް ހުރަސްތައް ނައްތާލުމަކީ ދޭދޭ ގުޅުން އާ އުސްމިނަކަށް ގެންދިއުމަށް ކޮށާލެވޭނެ ތަނަވަސް މަގެއް ކަމަށްވެސް އިޝާރާތް ކުރައްވާފައެވެ.
މީގެ އިތުރުން، ރާއްޖޭގައި ކުރިއަރާފައިވާ ފަތުރުވެރި ކަމުގެ ސިނާއަތާއި ނޫ އިގުތިސޯދުގެ ފަލްސަފާއިން ކަންތައްތަކެއް އުނގެނި، ބަންގްލަދޭޝްގައިވެސް މި ސިނާއަތް ފުޅާ ކުރެވިދާނެ ކަމަށް ހައިކޮމިޝަނަރުގެ ލިޔުއްވުމުގައި ވަނީ އަލިއަޅުއްވާލައްވާފައެވެ.
ބަންގްލަދޭޝްއަށް ކުރައްވާ 2 ދުވަހުގެ ރަސްމީ ދަތުރުގައި، ބަންގްލަދޭޝްގެ ފޮރިން ސާވިސް އެކަޑަމީއާއެކުގައިވެސް އެމްއޯޔޫއެއްގައި ސޮއިކުރައްވާނެކަން ފޮރިން މިނިސްޓަރު ޝާހިދު ވަނީ އިއުލާން ކުރައްވާފައެވެ.
މިނިސްޓަރު ޝާހިދުގެ ދަތުރަށް އިޝާރާތް ކުރައްވަމުން ސަފީރު ވަނީ، މިއީ އަހަރުތަކަކަށްފަހު ހިނގާ މިފަދަ ފުރަތަމަ ބައްދަލުވުން ކަން ފާހަގަ ކުރައްވާފައެވެ. އެގޮތުން، ބަންގްލަދޭޝްއާއި ރާއްޖެއާއި ދެމެދު ސޮއިކުރާ 2 އެމްއޯޔޫއަކީ، ވިޔަފާރިއާއި، އިގުތިސޯދުގެ އިތުރުން ފަންނީ ރޮނގުން ގުޅުން ބަދަހިކޮށް، ބިދޭސީ މަސައްކަތްތެރިންނާ ގުޅޭ ކަންކަމަށް ހައްލުތަކެއް ހޯދާ، ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑު ކަމަށް ފަހު ސިއްހީ ދާއިރާ ހަރުދަނާ ކުރުމުގެ ރޮނގުން އެއްބާރުލުން ދިނުމަށް ފުރުސަތު ފަހި ކުރަނިވި ފަހުމްނާމާ ތަކަކަށް ވާނެ ކަން ސަފީރު ވަނީ ފާހަގަ ކުރައްވާފައެވެ.
ފޮރިން މިނިސްޓަރުގެ މި ދަތުރަކީ ދޭދޭ ގުޅުންތަކުގެ އާ އުދަރެހަކަށް އަލިވިލި، ދޭދޭ ގުޅުންތައް އިތުރަށް ބަދަހިވެ، ދެ ގައުމުގެ ރައްޔިތުންގެ ކުރިއެރުމަށް ހިއްސާކުރާ އަމާޒަށް ވާސިލުވުމަށް މުހިންމު ދަތުރަކަށް ވާނެ ކަމަށް ގަބޫލު ކުރައްވާ ކަމަށްވެސް ސަފީރު ވަނީ ވިދާޅުވެފައެވެ.
ދިވެހިރާއްޖެއާއި ބަންގްލަދޭޝްއާ ދެމެދު ޑިޕްލޮމެޓިކް ގުޅުން ބަދަހި ކުރީ 1978 ވަނަ އަހަރުއެވެ. އޭގެ ފަހުން، ސަގާފީ، އިލްމީ، ސިއްހީ، ކުޅިވަރު އަދި ވައިގެ ހިދުމަތްތަކާ ގުޅޭ ދާއިރާތަކުން ދޭދޭ މަސްލަހަތު އެކުލެވޭ އެއްބަސްވުންތަކުގައި ދެ ގައުމުންވެސް ވަނީ ސޮއިކޮށް، ގުޅުން ބަދަހިކޮށްފައެވެ. ކޮވިޑް-19ގެ ބަލިމަޑުކަމުގައިވެސް ބަންގްލަދޭޝްއިން ވަނީ ރާއްޖެއަށް ދީލަތި އެހީތަކެއް ފޯރުކޮށްދީފައެވެ.
