ސަރަހައްދީ އިމުގެ މަސްރަހު ހޫނުވެ ބޮޑު ފާރު ރޭނުމަކީ އިންސާނީ ތާރީހަށް ބަލާއިރު އާ ކަމެއް ނޫނެވެ. މިފަދަ މަންޒަރެއް އެންމެ ފަހުން ފެނިފައި ވަނީ ދުނިޔޭގެ އެންމެ ނުފޫޒުގަދަ ގައުމުގެ މަގާމުގައި އޮތް އެމެރިކާއިންނެވެ.
މި ފާރަކީ ދެބަޔަކު ދެތަން ކުރުމަށް ތައްޔާރު ކުރި ފާރެއް ނަމަވެސް، މި ފާރުގެ ދެ ފަރާތަށް ވާގޮތަށް ހަރުކުރި ފިޔާތޮށި ކުލައިގެ ސީސޯތަކުން ދިނީ ތަފާތު މެސެޖެކެވެ. ބޯޑަރުގެ އެމެރިކާއާއި ވީ ފަޅިއާއި މެކްސިކޯއަށް ވީ ފަޅިއަށް ވާ ގޮތަށް ހަރުކުރި ސީސޯތައް ވީ، ދެގައުމުގެ މީހުން އެއްތަން ކުރުވާ، އުފާވެރި ވަގުތުތަކެއް ހޭދަ ކުރުމުގެ ފުރުސަތު ތަނަވަސްކޮށްދިން ސީސޯތަކަކަށެވެ.
"ޓީޓާ ޓޮޓާ ވޯލް"އަށް ގިނަ ބައެއްގެ ސަމާލުކަން ހުއްޓުނުއިރު، އިނގިރޭސިވިލާތުގެ ޑިޒައިން މިއުޒިއަމް އިން ދޭ ބީޒްލީ ޑިޒައިން އޮފް ދަ އިޔާގެ އެވޯޑް، މި ސީސޯ ތަކަށް ވަނީ ލިބިފައެވެ.
ދެ ގައުމުގެ މީހުންނަށް އެކުގައި އުފާވެރި ވަގުތުކޮޅެއް ހޭދަކޮށްލުމަށް ފުރުސަތު ފަހިކޮށްދޭ މި ސީސޯތައް ހަރުކުރީ ރޯނާލްޑް ރައޭލްއާއި ވާޖީއާ ސާން ފްރަޓެއްލޯއެވެ. މި ސީސޯތައް އެ ތަނުގައި ހުރީ އެންމެ 20 މިނެޓަށެވެ. ނަމަވެސް ސޯޝަލް މީޑިއާއަށް ދޫކޮށްލި ޕޯސްޓަތައް ވައިރަލްވީ އިންތިހާއަށެވެ.
ޑިޒައިން މިއުޒިއަމްގެ ޗީފް އެގްޒެކެޓިވް އަދި ޑައިރެކްޓާ ޓިމް މާލޯ ވިދާޅުވީ، "ޓީޓާ ޓޮޓާ ވޯލް"ގައި ހަރުކުރި ސީސޯތަކަކީ، އިންސާނީ ގުޅުމަށް އާ ގޮތްތަކެއް ހޯދާދިން އީޖާދެއް ކަމަށެވެ. މިއީ ބާރުތަކަކުން ވަކިކުރަން އުޅުނު ކަމުގައި ވީ ނަމަވެސް އެ ކަމުގެ މައްޗަށް ކުރި ހޯދިދާނެ ކަން އަންގައިދެނިވި، އިންގިލާބީ އީޖާދެއް ކަމަށްވެސް މާލޯ ވިދާޅުވިއެވެ.
"ޓީޓާ ޓޮޓާ ވޯލް"ގައި ސީސޯތައް ހަރުކުރުމުގެ ޑިޒައިން މަސައްކަތަށް 10 އަހަރު ދުވަސް ހޭދަވިއެވެ.
