ފުވައްމުލައް ސިޓީގައި މޫދަން އެރި އުޅެނިކޮށް އޮޔާ ދަމައިގަތް ކުއްޖަކު ސަލާމަތް ކުރަން އުޅެނިކޮށް މޫދު އަޑީގައި ފަރުގައި ތާށިވެ މަރުވި އުމުރުން 17 އަހަރުގެ އަހްމަދު ފައުޒާނަށް ރައީސް އިބްރާހިމް މުހައްމަދު ސޯލިހް ތައުރީފު ކުރައްވައިފިއެވެ.
ރައީސް ވިދާޅުވީ ފައުޒާން ވަކިވެގެން އެ ދިޔައީ ހިތްވަރުގަދަ ކަމުގެ ލާމަސީލު ނަމޫނާ ދައްކުވައި ދީފައި ކަމަށެވެ. އަދި އޭނާގެ އެ ގުރުބާނީން ގައުމު ރޮއްވައިލާފައި ކަމަށް ވެސް އެމަނިކުފާނު ވިދާޅުވިއެވެ. އެމަނިކުފާނު ވަނީ ފައުޒާނަށް ސުވަރުގޭގެ ދާއިމީ ނިއުމަތް މިންވަރު ކޮށްދެއްވުން އެދި ދުއާ ދަންނަވާފައެވެ.
ރައީސް ސޯލިހްގެ އިތުރުން ނައިބު ރައީސް ފައިސަލް ނަސީމް ވެސް ވަނީ ފައުޒާނަށް ތައުރީފު ކުރައްވާ، މަރްހޫމަށް ސުވަރުގޭގެ ދާއިމީ ނިޢުމަތް މިންވަރު ކުރެއްވުން އެދި ދުއާ ދަންނަވާފައެވެ. އެގޮތުން އެމަނިކުފާނު ވިދާޅުވީ ފުވައްމުލަކު ސްކޫލްގެ ދަރިވަރު އަހްމަދު ފައުޒާން އެންމެފަހު ވަގުތު ވެސް ދައްކުވައި ދިނީ، ތިމާގެ އަމިއްލަ ނަފުސަށް ވުރެ އެނެކާ ސަލާމަތް ކުރުމުގެ ވަރުގަދަ ހިތްވަރު ކަމަށެވެ.
ފައުޒާންގެ ހިތްވަރާއި އިންސާނިއްޔަތު ކަމަށް ގައުމުގެ ރައީސާއި ނައިބު ރައީސްގެ އިތުރުން ވަޒީރުންނާއި މަތީ ފަންތީގެ އެތައް ބަޔަކު ވަނީ ތައުރީފު ކޮށްފައެވެ. އަދި އޭނާ މަރުވުމުގެ ދެ ދުވަސް ކުރިން ފޭސްބުކްގައި އެދުނު ފަދައިން އޭނާއަށް މުޅި ގައުމުގެ ހެޔޮ ދުއާ މިއަދު ދަނީ ލިބެމުންނެވެ.
އިއްޔެ ހަވީރު ފުވައްމުލަކު މާނޭރެ އަތިރި ސަރަހައްދަށް މޫދަށް އެރި އުޅެނިކޮށް ގެއްލިފައި ވަނީ ގްރޭޑް 10ގައި ކިޔަވަމުންދާ އަހްމަދު ފައުޒާން ހަސަން ނަމަކަށް ކިޔާ އުމުރުން 17 އަހަރުގެ ކުއްޖެކެވެ. އިއްޔެ ހަވީރު އެ ކުއްޖާ މޫދަށް އެރިފައި ވަނީ އެކުގައި މޫދަށް ދިޔަ އަންހެން ކުއްޖަކު އޮޔާ ދަމައިގަތުމުން، އެ ކުއްޖާ ސަލާމަތް ކުރުމަށެވެ. އެ ކަމުގެ ތެރޭގައި އޭނާގެ އަމިއްލަ ފުރާނަ ދިޔައީ އެވެ.
