ކޮރޯނާވައިރަސް ޑިޒީޒް (ކޮވިޑް-19) އިން ދިފާއުވުމަށް، އިންޑިއާގެ ބާރަތު ބައޮޓެކުން ތަރައްގީ ކުރަމުން އަންނަ "ކޮވެކްސިން" އަށް ރުހުން ދިނުމަށް، އިންޑިއާގެ ނޭޝަނަލް ޑްރަގް ރެގިއުޅޭޓަރުގެ ސަބްޖެކްޓް އެކްސްޕާޓް ކޮމިޓީ (އެސްއީސީ)އިން ނިންމާފައި ވާކަން އެ ގައުމުގެ ސިއްހަތާ ބެހޭ ވުޒާރާއިން ހާމަކޮށްފިއެވެ.
އެސްއީސީއިން ކޮވެކްސިންއަށް ރުހުން ދިނީ ކުއްލި ހާލަތުގައި ބޭނުން ކުރުމުގެ ހުއްދައެއްގެ ގޮތުގައެވެ.
އިންޑިއާގެ ތަޖުރިބާކާރުންގެ ޕެނަލުން ވަނީ، އޮކްސްފޯޑް ޔުނިވާސިޓީއާއި އަސްޓްރާޒެނީކާ ކުންފުނިން ތަރައްގީ ކޮށްފައި ވާ "ކޮވިޝީލްޑް" ވެކްސިނަށްވެސް ހުކުރު ދުވަހުގެ ވަގުތެއްގައި ރުހުން ދީފައެވެ.
އިންޑިއާގެ ސެންޓްރަލް ޑްރަގް ސްޓޭންޑަޑް ކޮންޓްރޯލް އޯގަނައިޒޭޝަންގެ ހާއްސަ ކޮމިޓީއިން ހުކުރު ދުވަހު ވަނީ، ކުއްލި ހާލަތުގައި ބޭނުން ކުރުމަށް ހުއްދަ ދޫކުރުމަށް އެކަށީގެންވާ މިންވަރަށްވެސް ބާރަތު ބައޮޓެކަށް މައުލޫމާތު ފޯރުކޮށްދެވިފައި ނުވާކަން ހާމަކޮށްފައެވެ.
މިއަދުގެ ނިންމުމާއެކު އިންޑިއާގެ ސަރުކާރުން މިވަނީ 2 ވެކްސިނަކަށް ރުހުން ދީފައެވެ.
ކޮވެކްސިންއަކީ އިންޑިއާގެ އަމިއްލަ އުފެއްދުމެކެވެ. ބާރަތު ބައޮޓެކާއެކު މިމަޝްރޫއުގައި ހަރަކާތްތެރިވަނީ އިންޑިއަން ކައުންސިލް އޮފް މެޑިކަލް ރިސާޗުންނެވެ.
އިންޑިއާގެ ޑްރަގްސް ކޮންޓްރޯލާ ޖެނެރަލްގެ ހުއްދައަކަށް އެދި ބާރަތު ބައޮޓެކުން ހުށަހެޅީ މިދިޔަ ޑިސެމްބަރު މަހުގެ 7 ވަނަ ދުވަހުއެވެ. އިންޑިއާގައި އާންމު އުސޫލުން ވެކްސިން ދޭ މަޝްރޫއުގައި ވެކްސިނެއް ބޭނުން ކުރެވޭނީ ޑްރަގްސް ކޮންޓްރޯލާ ޖެނެރަލް އޮފް އިންޑިއާގެ ސިއްކައާއެކުގައެވެ.
އިންޑިއާއިން ދަނީ ކޮވިޑް-19ގެ ވެކްސިން ކެމްޕޭނަށް އެންމެ ފަހުގެ ތައްޔާރީތައް ވަމުންނެވެ. އެގޮތުން މިއަދު ވަނީ 2 ވަނަ ބުރުގެ ޑްރައި-ރަން ވެކްސިން ކެމްޕޭން ނުވަތަ ޑްރިލް ހަރަކާތް، އެގައުމުގެ ހުރިހާ ސްޓޭޓެއްގައި ކުރިއަށް ގެންގޮސްފައެވެ.
