ވެސްޓް އެފްރިކާގެ ބޯ ޖަންގަލިތަކުގެ ތެރޭގައި ދިރިއުޅެމުން އަންނަ ޗިމްޕަންޒީތަކެއްގެ ހަށިގަނޑުން ޖުޒާމު ބަލި (ލެޕްރަސީ) ގެ އަސަރު ފެނިފައި ވާ ކަމަށް ސައެންސްވެރިން ހާމަކޮށްފިއެވެ.
ޗިމްޕަންޒީތަކަށް ޖުޒާމު ބަލި ޖެހިފައި ވަނީ އިންސާނުންގެ ފަރާތުން ނޫން ކަމަށް ސައެންސްވެރިން ގަބޫލު ކުރެއެވެ. ނަމަވެސް، ޗިމްޕަންޒީތަކަށް މި ބަލި ޖެހުނު މަސްދަރެއް އަދި ނުހޯދެއެވެ.
ދިރާސާ ޓީމުން އާންމު ކުރި ޕްރީ-ޕްރިންޓް ކަރުދާހުގައި ވާ ގޮތުން، ގިނީ ބިސާއޯއާއި ކޯޓޭޑިއަވޮއާގެ ޗިމްޕަންޒީ އާއިލާއިން މި ބަލީގެ އަސަރު ވަނީ ފެނިފައެވެ.
އެކި ސަރަހައްދުތަކުގައި ކެމެރާ ހަރުކޮށްގެން ނަގާފައިވާ ފުޓޭޖުތަކަށް ބަލާއިރު، ޖުޒާމު ބަލީގެ ސަބަބުން ޗިމްޕަންޒީއަށް ވެސް ކުރަނީ އިންސާނުންނަށް ކުރާ ޒާތުގެ އަސަރުތަކެވެ. އެގޮތުން، ގުނަވަންތައް އައިބުވުމުގެ އަސަރު ފެންނަން ހުރި ކަމަށް މައުލޫމާތު ލިބެއެވެ.
ޗިމްޕަންޒީތަކަށް ޖުޒާމު ބަލި ޖެހިފައި ވާ ކަން ކަށަވަރުކުރީ، ބޮޑުކަމުދާ ތަކެތީގެ ސާމްޕަލް ނަގައިގެންނެވެ. ބޮޑުކަމުދާ ތަކެތި ޓެސްޓު ކުރި ކުރުމުން، އޭގައި، ޖުޒާމު ބަލި ޖައްސާ ބެކްޓީރިއާ (މައިކްރޮބެކްޓީރިއަމް ލެޕްރޭ) ހުރި ކަމަށް މައުލޫމާތު ލިބެއެވެ.
ޖުޒާމު ބަލި ޖެހިފައިވާ އިތުރު ބާވަތްތަކުގެ ދިރޭތަކެތިވެސް ފެނިފައި އެބަހުއްޓެވެ. އެގޮތުން ސުކުއިރަލްއާއި އާމެޑެލޯއޭ ކިއާ ޒާތުގެ ޖަނަވާރުތަކުގެ ކިބައިންވެސް މި ބަލީގެ އަސަރު ފެނިފައިވެއެވެ. ދެ ސަރަހައްދުން ނެގި ސާމްޕަލްތަކުގައި، ބަލީގެ ތަފާޓު 2 ސްޓްރެއިންއެއް އުޅޭ ކަމަށް ހަބަރު ލިބެއެވެ.
އެމެރިކާއާއި ޖަޕާނުންވެސް ވަނީ ޗިމްޕަންޒީގެ ހަށިގަނޑުން ޖުޒާމު ބަލި ފެނިފައިވާ ކަމަށް ރިޕޯޓް ކޮށްފައެވެ.
