ދުނިޔޭގެ އެންމެ މުއްސަނދި، މަހުޖަނުންގެ ލިސްޓުގެ އެންމެ ކުރިން ޖާގަ ހޯދަމުން އަންނަ ވިޔަފާރިވެރިންގެ ތެރޭގައި ހިމެނޭ އީލޯން މަސްކުގެ މިލްކިއްޔާތަށް އަނެއްކާވެސް އެތައް ބިލިއަން ޑޮލަރެއް އިތުރުވެއްޖެއެވެ.
އެމެރިކާގެ ހިއްސާގެ ބާޒާރުގައި މުއާމަލާތު ކުރާ އެންމެ ވަރުގަދަ 500 ކުންފުނި ހިމެނޭ ސްޓޮކް މާކެޓް އިންޑެކްސް "އެސް އެންޑް ޕީ" ގައި، މަސްކުގެ ޓެސްލާ ކުންފުނި ލިސްޓު ކުރުމާއެކު، އޭނާގެ މިލްކިއްޔާތަށް، ހުކުރު ދުވަހު 9 ބިލިއަން ޑޮލަރު އިތުރުވި ކަމަށް މައުލޫމާތު ލިބެއެވެ.
ބްލޫމްބާގް ބިލިއަނާޒް އިންޑެކްސްގެ ރެކޯޑްތަކަށް ބަލާއިރު، އުމުރުން 49 އަހަރުގެ މަހުޖަނުގެ މިލްކިއްޔާތުގެ މިހާރުގެ އަގަކީ 167.3 ބިލިއަން ޑޮލަރެވެ. މަސްކުގެ މިލްކިއްޔާތަށް މި އަހަރު އެކަނިވެސް، 139.7 ބިލިއަން ޑޮލަރު އިތުރުވިއެވެ.
ޓެސްލާ ކުންފުނީގެ ހިއްސާގެ އަގުތައް ވަނީ 731 ޕަސެންޓް އިތުރުވެފައެވެ. މިއާއެކު ހުކުރު ދުވަހު ޓެސްލާ ކުންފުނީގެ ހިއްސާއެއްގެ އަގު ވަނީ 695 ޑޮލަރަށް އަރާފައެވެ.
މިވަގުތު ދުނިޔޭގައި ހުރި އެންމެ މުއްސަނދި މީހަކީ އެމެޒޯން ކުންފުނީގެ ވެރިޔާ ޖެފް ބޭޒޯސްއެވެ. ބޭޒޯސްގެ މިލްކިއްޔާތުގެ އަގު 187.3 ބިލިއަން ޑޮލަރަށް އަރައެވެ.
