ތާރީހުގައި ފުރަތަމަ ފަހަރަށް އެމެރިކާއިން ހަނދުގައި ދިދަދައެއް ނެގި ކަމަށް ބުނިތާ ބައި ގަރުނު ފަހުން، ވާދަވެރި ޗައިނާއިންވެސް އެ ގައުމުގެ ދިދަ، ހަނދުގައި ޖަހައިފިއެވެ.
ޗައިނާގެ ނޭޝަނަލް ސްޕޭސް އެޑްމިނިސްޓްރޭޝަން އިން ވަނީ، އެ ގައުމުގެ "5-ތަރި" ދިދަ، ހަނދުގައި ޖަހާފައިވާ މަންޒަރު އާންމުކޮށް، ހިއްސާކޮށްފައެވެ. އެމެރިކާއިން އާންމު ކުރި މަންޒަރާ ހިލާފަށް، ވައިގެ އެއްވެސް އަސަރެއް ނެތް ހަނދުގައި ޗައިނާއިން ޖެހި ދިދާގައި އެއްވެސް ހަރަކާތެއް ވަތީއެއް ނުފެނެއެވެ.
ހަނދުގައި ޗައިނާގެ ދިދަ ޖަހާފައިވާ މަންޒަރު ދުނިޔެއަށް ފޮނުވީ، ހަނދުން ހިލަޔާއި ވެލީގެ ސާމްޕަލް ނެގި ޖައްވީ އުޅަނދު، "ޗަންގީ-5" އިންނެވެ. އެއީ ހަނދުގެ ސަތަހައިން އުދުއްސާލުމުގެ ކުރިންނެވެ.
ޗައިނާއިން ހަނދުގައި ޖެހީ 2 މީޓަރު ފުޅާ، 90 ސެންޓިމީޓަރު އުސް ދިދައެކެވެ. މި ދިދައިގެ ބަރުދަނުގައި ހުންނަނީ 1 ކިލޯގްރާމް ކަމަށް ބުނެވެއެވެ. ދިދައިގެ ހުރިހާ ބައިތަކެއްވެސް އުފައްދާފައިވަނީ، ގަދަ ފިނީގައި ގެއްލުމެއް ނުލިބޭ ފަދަ ގޮތަކަށް ކަމަށް ޗައިނާގެ މީޑިއާއިން މައުލޫމާތު ދެއެވެ. ދުނިޔެގެ ބިމުން މި ފެންނަ ޒާތުގެ ދިދައަކީ ހަނދުގައި ބެހެއްޓޭނެ ދިދައެއް ނޫން ކަމަށް ޕްރޮޖެކްޓް ޑިވަލޮޕަރު ޗެންގް ޗާންގް ވަނީ ވިދާޅުވެފައެވެ.
ހަނދުގައި އެންމެ ފުރަތަމަ ދިދައެއް ނެގި ކަމުގެ ރެކޯޑް ކަށަވަރު ކުރި ކަމަށް ބުނަނީ އެމެރިކާއިންނެވެ. އެއީ 1969 ވަނަ އަހަރުގެ "އެޕޯލޯ-11" މިޝަންގައެވެ. އޭގެ ފަހުން 1972 ވަނަ އަހަރާ ހަމައަށް އެމެރިކާއިން 5 ފަހަރެއްގެ މަތިން، ހަނދުގައި ދިދަ ޖެހި ކަމަށް ބުނެވެއެވެ.
2012 ވަނަ އަހަރު ނާސާއިން ވަނީ، އެ 5 ދިދަ އަދިވެސް ހަނދުގައި އެބަހުރި ކަމަށް، ސެޓެލައިޓް ފޮޓޯތަކުން ހާމަ ވާކަމަށް ބުނެފައެވެ. ނަމަވެސް ތަޖުރިބާކާރުން ވަނީ، އިރުގެ އަވިން، އެ ދިދަތަކުގެ ކުލަ ވެއްޓިދާނެ ކަމަށް ބުނެފައެވެ. އެމެރިކާއިން ހަނދަށް ދިޔަ ކަމާއި، ދިދަ ޖެހި ކަމާ މެދު ތަފާތު އެކި ގޮތްގޮތަށް ވާހަކަ ދެކެވެއެވެ. އެގޮތުން ހަނދުގައި ޖަހާފައިވާ އެމެރިކާގެ ދިދަ، ވިހުރެމުންދާ ފަދަ ގޮތަކަށް ތަސްވީރު ވުމަކީ، މި މަންޒަރުތަކުގެ ސައްހަ ކަމާ މެދު ގިނަ ބަޔަކު އެންމެ ވަރުގަދައަށް ސުވާލު އުފައްދާ އެއް ސަބަބެވެ. ހަނދުގެ ސަތަހައަކީ ވައިގެ އެއްވެސް އަސަރެއް ނެތް ތަނެކެވެ.
