އެއިޑްސް ބަލި ފެތުރުމަށް މަގުފަހިވާ ފަދަ އާދަތައް ރާއްޖޭގައި އެބަހުރިކަމަށް ހެލްތު މިިނިސްޓަރު އަހުމަދު ނަސީމް ވިދާޅުވެއްޖެއެވެ.

މިއަދު ފާހަގަކުރާ ދުނިޔޭގެ އެއިޑްސް ދުވަހާ ގުޅިގެން ނަސީމް ދެއްވި ހިތާބުގައި ވިދާޅުވީ ރާއްޖެއަކީ އެޗްއައިވީ އާއި އެއިޑްސް ޖެހޭ މީހުންގެ އަދަދު މަދު ގައުމެއްގެ ގޮތުގައި ދެމެހެއްޓުމަށް ގިނަ މަސައްކަތް ތަކެއް ކަމާ ބެހޭ ފަރާތްތަކުން ކުރާ ކަމަށެވެ.

1990 ގެ އަހަރުތަކުގައި އެއިޑްސް އާދެކޮޅަށް ކުރި މަސައްކަތުން ފަހާގަ ކޮށްލެވޭ ކުރިއެރުންތަކެއް ލިބިފައިވީ ނަމަވެސް އަދިވެސް އެޗްއައިވީ އާއި އޭޑްސް އަކީ ދުނިޔޭގެ އާއްމު ސިއްހަތަށް ހުރި ނުރައްކަލެއް ކަން މިނިސްޓަރ ފާހަގަކުރެއްވިއެވެ. އަދި މިހާރުގެ ހާލަތާއި ގުޅިގެން އާއްމު ސިއްހަތާ ގުޅޭ އެހެނިހެން ކަންތައްތަކަށް ދަތިތައް ދިމާވަމުންދާއިރު އޭޑްސް އާ ދެކޮޅަށް ކުރަމުންދާ މަސައްކަތްތަކަށްވެސް އެކި ކަހަލަ ގޮންޖެހުންތައް ކުރިމަތިވަމުންދާ ކަަން ވެސް މިނިސްޓަރު ފާހަގަކުރެއްވިއެވެ.

ރާއްޖޭގައި ކުރެވިފައިވާ އެސެސްމަންޓްތަކާއި ދިރާސާތަކުން ދައްކާ ގޮތުގައި ރާއްޖޭގައި މި ބަލި ފެތުރިގެން ދިޔުމަށް މަގުފަހިވާ ފަދަ އާދަތައް ފެންނަންއެބަހުރި. ވީމާ، އޭޑްސް އަކީ އިސްކަންދޭ ކަމެއްގެ ގޮތުގައި ބާއްވާ، އޭޑްސްއާ ގުޅޭގޮތުން ހޭލުންތެރިކަން އިތުރުކުރުމާއި ރާއްޖޭގައި މިބަލި ފެތުރުން ހުއްޓުވުމަށްޓަކައި ކަމާ ގުޅުންހުރި އިދާރާތަކުން ކުރެވޭ މަސައްކަތްތައް އިތުރަށް ހަރުދަނާ ކުރުމަށް ވިސްނަންޖެހޭ. އަދިމިހާރުވެސް ގިނަ މަސައްކަތްތަކެއް ދަނީ ކުރެވެމުން. އެގޮތުން މިބައްޔަށް ދެވޭ ފަރުވާ އަދި ފަރުވާއަށް ބޭނުންވާ އެހެނިހެން ވަސީލައްތައް ހަމަޖައްސާފައިވަނީ ސަރުކާރުގެ ފަރާތުން ހިލޭ ފޯރުކޮށްދެވޭ ޚިދުމަތެއްގެ ގޮތުގައި.
މިނިސްޓަރު

މިދުވަސް ފާހަގަ ކުރުމުގެ މަގްސަދުތަކުގެ ތެރޭގައި އޭއިޑްސްއާ ދެކޮޅަށް ކުރަމުންދާ މަސައްކަތްތަކުގެ އަގުވަޒަންކުރުން ހިމެނޭ ކަމަށްވެސް މިނިސްޓަރުގެ ވާހަކައިގައި ވިދާޅުވިއެވެ. އެގޮތުން އެ ބައްޔަށް ދެވޭ ފަރުވާ އަދި ފަރުވާއަށް ބޭނުންވާ އެހެނިހެން ވަސީލަަތްތައް ހަމަޖައްސާފައިވަނީ ސަރުކާރުގެ ފަރާތުން ހިލޭ ފޯރުކޮށްދެވޭ ހިދުމަތެއްގެ ގޮތުގައިކަން މިނިސްޓަރު ފާހަގަކުރެއްވިއެވެ.

އަޅުގަނޑަށް އަޑުއިވިފައިވާ ގޮތުގައި އެޗްއައިވީ އާ ދެކޮޅަށް އަދި ބައްޔަށް ފަރުވާދިނުމަށް މަސައްކަތް ކުރާ ފަރާތްތައް މަސައްކަތް ކުރަނީ މި ބަލީގެ ސަބަބުން ލިބޭ ވޭނާއި ކެކުޅުން އަދި އާއިލާތަކަށް ލިބޭ ގެއްލުމަށާއި ހިތްދަތިކަމަށްވެސް ވަރަށް ބޮޑަށް ރިއާޔަތްކުރެވި ބަލިމީހާ އާއި އާއިލާއަށް ލިބޭ ނުތަނަވަސްކަން ކުޑަކުރުމަށް ވިސްނުމާއި ފިކުރުދީގެން. ބަލިން ރައްކާތެރިވުމަށާއި ބަލީގައި އުޅުމުގައި އެގެންޖެހޭ ރަނގަޅު މައުލޫމާތާއި އެހީތެރިކަން ފޯރުކޮށްދީގެން.
މިނިސްޓަރު

ރާއްޖޭގައި އެޗްއައިވީ އާއި އެއިޑްސް ފެތުރުން ހުއްޓުވުމަށްޓަކައި ކަމާ ގުޅުންހުރި އިދާރާތަކުން ކުރަމުންދާ މަސައްކަތް މިހާރަށްވުރެ ހަރުދަނާކޮށް، އަދި އެއިޑްސް ބަލި މީހުންނަށް ބޭނުންވާ ފަރުވާގެ ކަންތައް މިފަދަ ދަނޑިވަޅެއްގައި ބަލީމީހުންނަށް ލުއި ފަސޭހަގޮތެއްގައި ލިބޭނެގޮތް ހަމަޖެއްސުމަށާއި އެއިޑްސްގެ ބަލިމީހުންނާ ދޭތެރޭ ދެކޭގޮތާއި ތަފާތުކުރުން މުޖުތަމައުން ނައްތާލާ އެފަރާތްތަކަށް ބޭނުންވާ އެހީތެރިކަން ފޯރުކޮށްދިނުމަށް މިނިސްޓްރު ގޮވާލެއްވިއެވެ.

އަދި ރާއްޖެއަށް ލިބިފައިވާ 'މައިމީހާގެ ފަރާތުން ދަރިފުޅަށް އެޗްއައިވީ ޖެހުން ނައްތާލެވިފައިވާ ގައުމެއް'ގެ ނަން އެ ގޮތުގައި ދެމެހެއްޓުމަށް މިނިސްޓަރު އިލްތިމާސްކުރެއްވިއެވެ.

މިއަހަރުގެ އެއިޑްސް ދުވަހުގެ ޝިއާރުގެ ގޮތުގައި ކަނޑައަޅާފައިވަނީ "ގްލޯބަލް ސޮލިޑަޓަރީ، ޝެއާޑް ރެސްޕޮންސިބިލިޓީ" ނުވަތަ ދުނިޔޭގެ އެންމެން އެކުގައި، މިއީ އެންމެންގެ ޒިންމާ"އެވެ. މިއީ މިހާރު މުޅިދުނިޔެއަށް ދިމާވެފައިވާ ކޮވިޑް 19 ގެ ބަލިމަޑުކަމުގެ ހާލަތާ ގުޅުވައިގެން ކަނޑައަޅާފައިވާ ޝިއާރެކެވެ.