އެޗްއައިވީ، ވައިރަލް ހެޕަޓައިޓިސް އަދި ސެކްޝުއަލީ ޓްރާންސްމިޓެޑް އިންފެކްޝަންސް ގެ ނޭޝަނަލް ގައިޑްލައިންތައް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު، އިފްތިތާހު ކޮށްދެއްވައިފިއެވެ.
މި ގައިޑްލައިންތައް ސާޖިދާ އިފްތިތާހުކޮށް ދެއްވީ ބައިނަލްއަގްވާމީ އެއިޑްސް ދުވަސް ފާހަގަކުރުމަށް މިއަދު ހެނދުނު މީރުމާ މާލަމުގައި ބޭއްވި ރަސްމިއްޔާތެއްގައެވެ.
މި ރަސްމިއްޔާތުގައި އެޗްއައިވީ، ވައިރަލް ހެޕަޓައިޓިސް އަދި ސެކްޝުއަލީ ޓްރާންސްމިޓެޑް އިންފެކްޝަންސް، ނޭޝަނަލް ގައިޑްލައިންތައް އިފްތިތާހުކޮށް ދެއްވުމަށްފަހު، އެ ގައިޑްލައިންތަކުގެ މައްޗަށް ޕެނަލް ޑިސްކަޝަނެއް ކުރިއަށް ގެންގޮސްފައި ވެއެވެ. މި ޕެނަލް ޑިސްކަޝަންގައި ރާއްޖޭގައި މި ބަލިތައް ފެތުރުމާއި ބަލިތައް ދެނެގަތުމާއި އަވަސް ފަރުވާ ދިނުމާ ގުޅޭ ގޮތުން ވަރަށް ފުޅާ ދާއިރާއެއްގައި މަޝްވަރާ ކޮށްފައި ވެއެވެ.
އެޗްއައިވީ އަށް ފަރުވާ ދިނުމާ ގުޅޭ ގައިޑްލައިން އަލުން އެކުލަވާލާފައި މި ވަނީ ނުވަ އަހަރުގެ މެދުކެނޑުމަކަށް ފަހުގައެވެ.
ރައީސް އޮފީހުން ބުނީ، އެޗްއައިވީ، ވައިރަލް ހެޕަޓައިޓިސް އަދި ސެކްޝުއަލީ ޓްރާންސްމިޓެޑް އިންފެކްޝަންސްއާ ގުޅޭ ގައިޑްލައިންތައް އެކުއެކީގައި މުތާލިއާ ކުރެވި، އެކުލަވާލެވި، އަދާހަމަކުރެވި، ތަންފީޒުކުރެވެން ފެށިގެން ދިއުމަކީ މިދާއިރާއިން ރާއްޖެއަށް ލިބިގެންދާ ވަރަށް ބޮޑު ކުރިއެރުމެއް ކަމަށެވެ. މި ގައިޑްލައިންތަކަކީ ދުނިޔޭގެ ސިއްހަތު ޖަމިއްޔާގެ އެންމެ ފަހުގެ އިރުޝާދާއި ލަފާގެ މައްޗަށް އެކުލަވާލާފައިވާ ގައިޑްލައިންތަކެއް ކަމަށް ރައީސް އޮފީހުން ބުނެއެވެ.
