ބުރުކީނާ ފާސޯ، ޔަމަން، ދެކުނު ސުދާން އަދި ނައިޖިރިއާގެ ސަރަހައްދުތަކެއް، ކުރިއަށް އޮތް 3 ނުވަތަ 6 މަހެއްހާ ދުވަހުގެ ތެރޭގައި ބަނޑަށް ޖެހިދާނެ ކަމުގެ އިންޒާރު، އދއިން ދީފިއެވެ.
ކާބޯތަކެއްޗާއި ދަނޑުވެރި ކަމާ ބެހޭ އދގެ އިދާރާ (އެފްއޭއޯ) އާއި ވޯލްޑް ފުޑް ޕްރޮގްރާމް (ޑަބްލިއުއެފްޕީ) ގުޅިގެން އެކުލަވާލި "އާލީ ވޯނިންގް އެނާލިސިސް އޮފް އެކިއުޓް ފުޑް އިންސެކިއުރިޓީ ހޮޓްސްޕޮޓްސް" ރިޕޯޓް ބުނާ ގޮތުގައި، ކޮރޯނާވައިރަސް ޑިޒީޒް (ކޮވިޑް-19) ގެ ބަލިމަޑުކަމުގެ ސަބަބުން ކާބޯތަކެތި ހޯދުމުގައި ދަތިތަކާ ކުރިމަތިވެ، އިންތިހާ ބަނޑުހައިހޫނު ކަން ތަހައްމަލު ކުރަން ޖެހޭ މީހުންގެ އަދަދު އިތުރު ވާނެއެވެ.
މި ރިޕޯޓުން ދައްކާ ގޮތުގައި، ބަނޑަށްޖެހުމުގެ ތުންފަތް މަތީގައި ތިބި އެތައް މިލިއަން ބަޔަކަށް ވަނީ، ކޮވިޑް-19ގެ ސަބަބުން އިތުރު ތަކުލީފުތަކަކާވެސް ކުރިމަތިވެފައެވެ. އެގޮތުން ވަޒީފާ ގެއްލުމާ، ދަނޑުވެރި ކަމުގެ މަސައްކަތްތައް ހީނަރުވުމާ، ތެލުގެ އަގުތައް ދަށަށް ދިއުން ފަދަ އެތައް ގޮންޖެހުމަކާ ކުރިމަތިލާން ޖެހިފައި ވާ ކަމަށް މި ރިޕޯޓް ބުނެއެވެ.
ބުރުކީނާ ފާސޯ، ޔަމަން، ދެކުނު ސުދާން އަދި ނައިޖިރިއާ އަކީ ހަނގުރާމައާއި ހަމަނުޖެހުންތަކުގެ އިތުރުން ގެދޮރު ގެއްލުމާ، އިގުތިސޯދީ ކާރިސާގެ އިތުރުން މޫސުމީ ކާރިސާތަކާ، ދަނޑުވެރިކަމާ ގުޅުން ހުރި އެކި ގޮންޖެހުންތަކާވެސް ކުރުމަތިލަމުން ދިޔަ އާބާދީއެއް ދިރިއުޅެމުންދާ ގައުމުތަކެކެވެ. ކޮވިޑް-19ގެ ހަރުކަށި ފިޔަވަޅުތަކާއެކު، މި ތަކުލީފުތައް އިތުރަށް ބޮޑުވީއެވެ.
ކާބޯތަކެތީ ސަލާމަތްތެރިކަމާ ކަށަވަރުކަން ގެއްލިފައިވާ މީހުންގެ ތެރޭގައި ހިމެނެނީ ދަނޑުވެރިންނާއި، ނާމްސޫފި ގެންގުޅޭ މީހުންނާއި، މަސްވެރިންނާ، ޖަންގަލިތަކުގައި މަސައްކަތް ކުރާ މީހުންނެވެ. މިފަދަ މީހުން ބަރޯސާވާނެ އިތުރު މާލީ ރިޒާވެއް ނެތުމުގެ ސަބަބުން، އާންމު ދިރިއުޅުމުގެ އާދަތަކުން އެކަހެރިވާން ވަނީ މަޖުބޫރުވެފައެވެ.
ކޮރޯނާ 19 އަކީ ބަޔެއް ޤައުމުތަކުގެ އިޤުތުސާދު ފުޑާލާ ހަލާކުކޮށް ވީރާނާކޮށް ބަޔެއް ޤައުމުތަށް އިދެޖައްސާލާ ޤައުމުތަށް ފޭރިގަތުމަށް ދުނިޔޭގެ އިޤުތިސާދުގައި އުޅޭ މާފެޔާ ގުރޫޕަކުން ހިންގާ ހަރަކާތެއް !