ސޯޝަލް މީޑިއާ މެސެޖިންގް އެޕްލިކޭޝަނެއްގެ ގޮތުގައި ބޭނުން ކުރަމުން އަންނަ ވަޓްސްއެޕްގެ ޗެޓްތައް އަބަދުގެ އަބަދަށް މިއުޓް ކޮށްފައި ބެހެއްޓޭނެ ފީޗާއެއް ތައާރަފުކޮށްފިއެވެ.
ފާއިތުވީ ހަފުތާތަކުގައި ޓެސްޓު މަރުހަލާގައި އުޅުނު "މިއުޓް އޯލްވޭޒް" ނުވަތަ "ތާއަބަދުގެ ހިމޭންކަން" ފީޗާ، މިހާރު ވަނީ އެންޑްރޮއިޑް އަދި އައިއޯއެސްއަށް ވެސް ތައާރަފުކޮށްފައެވެ.
މި އަޕްޑޭޓް އައުމާ ހިސާބަށް އެންމެ ދިގު މުއްދަތަކަށް ޗެޓްތައް މިއުޓް ކުރެވެން އޮތީ އަހަރެއްހާ ދުވަހަށެވެ.
ވަޓްސްއެޕްގެ "މިއުޓް" ފީޗާ ފަރުމާކޮށްފައި ވަނީ، އެ ފީޗާ އިހުތިޔާރު ކުރުމުން އެ މުއްދަތަކަށް، ނޯޓިފިކޭޝަން ދޭ އުސޫލު ބަދަލުވާ ގޮތަށެވެ. އެގޮތުން ފޯނު ވައިބްރޭޓްވެގެން ނޫނީ ރިންގުވެގެން ދޭ އެލާޓްގެ ބަދަލުގައި، މި ފީޗާ އިހުތިޔާރު ކުރުމުން، ފޯނުގެ މަތީ ބާއަށް އެ ނޯޓިފިކޭޝަންއެއް އަރާފައިބައިގެން ދިއުން ފިޔަވާ އިތުރު ކަމެއް ނުވާނެއެވެ.
ހަލުވިކަމާއެކު ފެތުރެމުންދާ ކޮވިޑް-19ގެ ބަލިމަޑުކަމާއެކު ދޮގު ޚަބަރު ފެތުރުމުގެ ބިރުވެރިކަން އިންތިހާއަށް އިތުރުވަމުންދާއިރު، ވަޓްސްއެޕްއިން ވަނީ މިކަމާ ކުރިމަތިލުމަށް ފިޔަވަޅުތަކެއް އަޅާފައެވެ. ވަޓްސްއެޕްއިންވަނީ އެއް ޔޫޒާ އެކައުންޓްއިން އެއް މެސެޖެއް 5 އެކައުންޓަށް ވުރެ ގިނައިން ފޮނުވާނަމަ އެ މެސެޖުތައް ހުއްޓުވަން ފަށާފައެވެ. އަދި އެއް ފަހަރާ އެއް ގުރޫޕަށްވުރެ ގިނަ ގުރޫޕަށްވެސް އެއް މެސެޖެއް ނުފޮނުވޭ ގޮތަށް ކަނޑައަޅާފައެވެ. ކަންމިހެން އޮތް ނަމަވެސް، ދޮގު ޚަބަރު ފެތުރުމާ ދެކޮޅަށް ވަޓްސްއެޕްއިން އަދިވެސް މަސައްކަތްތަކެއް ކުރަންޖެހޭ ކަމަށް ތަޖުރިބާކާރުން ދަނީ ބުނަމުންނެވެ.
