ގާތްގަނޑަކަށް 8 މަހެއްހާ ދުވަހުގެ މެދުކެނޑުމަކަށް ފަހު، ބިދޭސީ ޢުމްރާވެރިން ބަލައިގަތުމަށް، ސައުދީ އަރަބިއްޔާގެ ކިންގް ޢަބްދުލްޢަޒީޒު އިންޓަނޭޝަނަލް އެއާޕޯޓްގެ ޙައްޖު އެންޑް ޢުމްރާ ޓާމިނަލް ތައްޔާރު ކުރުމުގެ މަސައްކަތް ފަށައިފިއެވެ.
ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަން ފެތުރުން ކޮންޓްރޯލް ކުރުމަށް ޢުމްރާގެ އަޅުކަން މެދުކަނޑާލާފައި އޮތުމަށްފަހު، އެކި މަރުހަލާތަކަށް ބަހާލައިގެން އާ އާންމު ހާލަތަށް ރުޖޫއަ ވުމުގެ މަސައްކަތް ފަށާފައިވާއިރު، ކުރިއަށް އޮތީ ބިދޭސީ ޢުމްރާވެރިންނަށް ގައުމު ހުޅުވާލުމުގެ މަރުހަލާއެވެ.
ކިންގް ޢަބްދުލްޢަޒީޒު އިންޓަނޭޝަނަލް އެއާޕޯޓްގެ ޙައްޖު އެންޑް ޢުމްރާ ލޯންޖުތައް އޮޕަރޭޓް ކުރާ ކުންފުނީގެ ސީއީއޯ އަދުނާން އަލް-ސައްގާފު ވިދާޅުވީ، ކޮވިޑް-19ގެ ބަލިމަޑުކަން ފެތުރިގެން ދިއުން ކޮންޓްރޯލް ކުރުމަށް ކަނޑައަޅާފައިވާ ޕްރޮޓޮކޯލްއާއި އެއްގޮތަށް ކަންކަން ކަށަވަރު ކުރުމަށްޓަކައި، ރައްކާތެރި ކަމުގެ ގޮތުން އަޅަންޖެހޭ ފިޔަވަޅުތައް އެއާޕޯޓްގައި އަޅާފައި ވާ ކަމަށެވެ.
ފަސެންޖަރުންގެ މެދުގައި ޖިސްމާނީ ގައިދުރުކަން ދެމެހެއްޓުމުގެ އިންތިޒާމު ހަމަޖެހިފައި ވާނެ ކަމަށާ، ޓާމިނަލްތަކާ ކައުންޓަރުތަކުގައިވެސް މިކަން އޮންނާނެ ކަމަށް އަލް-ސައްގާފު ވިދާޅުވިއެވެ. ލުއި ދިނުމުގެ 3 ވަނަ މަރުހަލާގެ ތެރެއިން ބިދޭސީ ޢުމްރާވެރިންނަށް ފުރުސަތު ހުޅުވާލި ނަމަވެސް، ފުރަތަމަ ބެޗުގައި މާ ގިނަ އަދަދެއްގެ ބަޔަކު ޒިޔާރަތް ނުކުރާނެ ކަމަށްވެސް އަލް-ސައްގާފު ވިދާޅުވިއެވެ. ޢުމްރާވެރިންގެ އަދަދު އިތުރު ކުރުންވެސް ވަނީ މަރުހަލާތަކަކަށް ބަހާލެވިފައި ކަން އޭނާ ފާހަގަކުރެއްވިއެވެ.
އަލް-ސައްގާފު ވިދާޅުވީ އެތެރެވާ ޢުމްރާވެރިންނާ، ބޭރުވާ ޢުމްރާ ވެރިންވެސް އުޅޭނީ ވަކިން ކަމަށާ، އަންނަ ހަފުތާއިން ފެށިގެން މި ފެސިލިޓީތައް ބޭނުން ކުރަން ފެށޭވަރު ވާނެ ކަމަށެވެ.
ކޮވިޑް-19ގެ ބަލިމަޑުކަމަށް އަދި ނިމުމެއް އައިސްފައި ނުވާއިރު، ކުރިމަތިވެދާނެ ކަންކަމަށް މުވައްޒަފުން ތަމްރީނު ކުރުމުގެ މަސައްކަތްވެސް ސައުދީގެ އެއާޕޯޓުން ދަނީ ކުރަމުންނެވެ. އަދި ބައިނަލްއަގުވާމީ މިންގަނޑުތަކާ އެއްގޮތަށް އިންތިޒާމުތައް ހަމަޖެއްސުމަށްވެސް އެ ގައުމުގެ ކަމާ ބެހޭ ފަރާތްތަކުން ދަނީ މަސައްކަތް ކުރަމުންނެވެ.
ހަރުކަށި ފިޔަވަޅުތަކަށް ލުއި ދިނުމުގެ މަރުހަލާގެ ތެރެއިން ބިދޭސީ ޢުމްރާވެރިންނަށް ސައުދީއަށް ވަދެވޭނީ އަންނަ ނޮވެމްބަރު މަހުގެ 1 ވަނަ ދުވަހުން ފަށައިގެންނެވެ. 3 ވަނަ މަރުހަލާގެ ދަށުން ނޮވެމްބަރު 1 ވަނަ ދުވަހު ބިދޭސީ ޢުމްރާވެރިންނަށް ގައުމު ހުޅުވާލާއިރު، މައްކާ ޙަރަމްގެ 20 ޕަސެންޓް ކެޕޭސިޓީއަށް، ޑޮމެސްޓިކް އަދި ބޭރުގެ ޢުމްރާވެރިންނަށް ފުރުސަތު ދެވޭނެ ކަމަށް މައުލޫމާތު ލިބެއެވެ.
ބިދޭސީ ޢުމްރާވެރިން ބަލައިގަތުމަށް ޙައްޖު އެންޑް ޢުމްރާ މިނިސްޓްރީއިން ވާންޖެހޭ ހުރިހާ ތައްޔާރީއެއް ވެފައި ވާ ކަމަށް މައުލޫމާތު ލިބެއެވެ. ބިދޭސީ ޢުމްރާވެރިންގެ ކަންކަން ހަމަޖެއްސުމުގައި 700 ކުންފުންޏަކުން ހަރަކާތްތެރިވާނެ ކަމަށް ޚަބަރު ލިބެއެވެ.
ލުއި ދިނުމުގެ 2 ވަނަ މަރުހަލާ، މިމަހުގެ 18 ވަނަ ދުވަހު ތަންފީޒު ކުރަން ފެށި ފަހުން 120000 މީހުން ޢުމްރާވެފައި ވާއިރު، 45000 މީހުން ވަނީ މަސްޖިދު އަލް-ޙަރަމްގައި އަޅުކަން ކޮށްފައެވެ.
