ނޫސްވެރިޔާ އަހުމަދު ރިޟްވާން އަބްދުﷲ ގެއްލުވާލި މައްސަލާގައި ލިޔެކިޔުންތައް ކުރީ ސަރުކާރުން ގެންގޮސްފައިވާ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް މިނިސްޓަރު އިމްރާން ހާޒިރުވެ މެމްބަރުންގެ ސުވާލުތަކަށް ޖަވާބު ދެއްވާފައިވާ އިރު، ނައިފަރު ދާއިރާގެ މެންބަރު އަހުމަދު ޝިޔާމް ވަނީ، ނޫސްވެރިޔާ ރިޟްވާން ގެއްލުވާލާފައިވާ މައްސަލާ ގުޅޭ ލިޔެކިޔުންތަކެއް، މޭޑޭ މުޒާހަރާގެ ތެރޭގައި މިނިސްޓަރު އިމްރާން ދެއްކެވި ކަމަށާ، އެ ލިޔެކިޔުންތައް މިހާރު ކޮބައިތޯ ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން މިނިސްޓަރު އިމްރާން ވިދާޅުވީ މޭޑޭ މުޒާހަރާ އާ ގުޅިގެން ކުރީގެ ސަރުކާރުގައި ހައްޔަރު ކުރި ކަމަށާއި އެ ލިޔެކިޔުންތައް ފުލުހުން އޭރު، ހައްޔަރު ކުރުމަށް ފަހު އަތުލާފައިވާ ކަމަށެވެ.
މިނިސްޓަރު އިމްރާން ވިދާޅުވީ އެ ކަރުދާސް ތަކަށް ވީގޮތެއް ހޯދަން މިހާރު ޖެހޭނީ އިތުރު ތަހުގީގެއް ހިންގަން ކަމަށެވެ.
މޭޑޭގެ މުޒާހަރާގައި އިމްރާން ހައްޔަރު ކުރުމަށް ފަހު ޓެރަރިޒަމްގެ ދައުވާ އުފުލާ 12 އަހަރަށް ޖަލަށް ލުމަށް އޭރު ހުކުމް ކުރި އެވެ. އެހެން ނަމަވެސް ފަހުން އިސްތިއުނާފު މަރުހަލާގައި ސުޕްރީމް ކޯޓުން ވަނީ ދަށު ކޯޓުގެ ހުކުމް ބާތިލްކޮށް އިމްރާން މިނިވަން ކޮށްފައެވެ
