މުޅި ދުނިޔެ އިނދަޖައްސާލި ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމުގެ ތެރޭގައި، އާ އާންމު ހާލަތުގެ ދަށުން ގައުމުތައް ހުޅުވާލަން ފަށާފައި ވާއިރު، ކާރިސީ ހިރާސް އެންމެ ބޮޑުވި ޗައިނާގެ އިގުތިސޯދުން މިއަހަރުގެ 3 ވަނަ 3 މަސް ދުވަހުގެ ތެރޭގައި ކުރިއެރުންތަކެއް ހޯދައިފިއެވެ.
ލިބިފައިވާ ތަފާސް ހިސާބުތަކަށް ބަލާއިރު، މިއަހަރުގެ ޖުލައި މަހާ ސެޕްޓެމްބަރު މަހާ ދެމެދު ފާއިތުވީ 3 މަސްދުވަހުގެ ތެރޭގައި ޗައިނާގެ އިގުތިސޯދު ވަނީ 4.9 ޕަސެންޓަށް ކުރިއަރާފައެވެ.
ގައުމީ އުފެއްދުންތެރިކަމުގެ ނިސްބަތުން ބަލާއިރު، މުޅި ދުނިޔޭގައިވެސް މިވަގުތު އެންމެ ހަލުވިކަމާއެކު ކުރި އަރަމުން އަންނަނީ ޗައިނާ ކަން ފާހަގަކުރަންޖެހެއެވެ.
ނަމަވެސް، ޗައިނާގެ އިގުތިސޯދީ ކުރިއެރުމުގެ ދުވެލި އުޅެނީ، އިގުތިސޯދީ މާހިރުން ލަފާކޮށްފައިވާ މިންވަރަށް ވުރެ މަޑުކޮށެވެ. އިގުތިސޯދީ މާހިރުން ލަފާކުރި ގޮތުގައި، ޗައިނާގެ އިގުތިސޯދު، 5.2 ޕަސެންޓް ކުރިއަރާނެއެވެ.
މަޑު ދުވެއްޔެއްގައި ނަމަވެސް ޗައިނާގެ އިގުތިސޯދު ކުރިއަރަމުން އަންނަ ކަމަށް އެ ގައުމުން އާންމު ކުރި ތަފާސް ހިސާބުތައް ދައްކާފައި ވާއިރު، ބައެއް ތަޖުރިބާކާރުން ދަނީ ޗައިނާއިން ފޯރުކޮށްދީފައިވާ މައުލޫމާތާ މެދު ސުވާލު އުފައްދަމުންނެވެ.
ކޮވިޑް-19ގެ ސަބަބުން ދުނިޔޭގެ އިގުތިސޯދީ ކުރިއެރުން ހީނަރުވެފައިވާ މިދަނޑިވަޅުގައި، މި އަނދަވަޅުން އަރައިގަތުމަށް ޗައިނާގެ ސަރުކާރުން ދަނީ ހަރުކަށި ފިޔަވަޅުތަކެއްވެސް އަޅަމުންނެވެ. އެގޮތުން އިގުތިސޯދީ ހަރަކާތްތަކުގެ ތެރެއަށް ފައިސާ އިންޖެކްޓް ކުރުމުގެ މަސައްކަތްތަކެއް ކުރިތަންވެސް ވަނީ ފެނިގެން ގޮސްފައެވެ.
