ޗައިނާގެ ކޮމިއުނިސްޓް ސަރުކާރުން ޝީންޖިއާންގް ޕްރޮވިންސްއާއި ހޮންގްކޮންގްގައި ތަންފީޒު ކުރަމުންދާ ސިޔާސަތުތައް ކުށްވެރިކޮށް، މިހާރުން މިހާރަށް ޝީންޖިއާންގް ސަރަހައްދަށް ވަނުމުގެ ހުއްދަ ދިނުމަށް، 39 ގައުމަކުން ގޮވާލައިފިއެވެ.
ޗައިނާގެ ޝީންޖިއާންގް ޕްރޮވިންސްގައި ދިރިއުޅެމުންދާ ވީގޫރު މުސްލިމުންގެ ހައްގާއި ކަރާމާތަށް ރައްކާތެރި ވުމަށް ގޮވާލި ގައުމުތަކުގެ އިސް ސަފުގައި ހަރަކާތްތެރިވެފައި ވަނީ ޖަރުމަނުވިލާތުންނެވެ. ހަމަ މިއާއެކު، ޗައިނާގެ އިދާރީ ދާއިރާއެއްގެ ގޮތުގައި އެ ގައުމުން ބަލަމުން އަންނަ ހޮންގްކޮންގްގައި ޗައިނާއިން ތަންފީޒު ކުރަމުންދާ ސިޔާސަތުތަކާ މެދުވެސް މި ގައުމުތަކުން ވަނީ ކަންބޮޑުވުން ފާޅު ކޮށްފައެވެ.
އިންސާނީ ހައްގުތަކުގެ މައުލޫއަށް އދއިން ކުރިއަށް ގެންދިޔަ ބައްދަލުވުމެއްގައި، ޖަރުމަނުވިލާތުން އދއަށް ކަނޑައަޅާފައި ހުންނަވާ ސަފީރު ކްރިސްޓޯފް ހިއުސްޖެން ވިދާޅުވީ، ޝީންޖިއާންގްގައި އިންސާނީ ހައްގުތަކުގެ ހާލަތު އޮތް ގޮތާ މެދު ގައުމުތަކުން އިންތިހާއަށް ކަންބޮޑުވާކަމަށެވެ. އަދި ޝީންޖިއާންގްގެ މަސްރަހުގައި ކަން ހިނގަމުންދާ ގޮތް ވިލަރެސް ކުރުމަށް، އދގެ ހައްގުތަކާ ބެހޭ އޮބްޒާވަރުންގެ ޓީމަށް ޝީންޖިއާންގްއަށް ވަނުމުގެ ފުރުސަތު ބިނާކުރަނިވި ގޮތެއްގައި ދިނުމަށްވެސް ޖަރުމަނުވިލާތުގެ ސަފީރު ވަނީ ޗައިނާއަށް ގޮވާލައްވާފައެވެ.
ޗައިނާގެ ކޮމިއުނިސްޓް ސަރުކާރުން ޝީންޖިއާންގްގައި ހިންގަމުންދާ ލާއިންސާނީ ޖަރީމާތަކުގެ ތެރޭގައި، ދީނީ މިނިވަންކަން ނުގުޅައި ގަތުމާ، ސާވޭލަންސް ވަރުގަދަ ކުރުމާ، ގަދަކަމުން އަޅު މަސައްކަތް ކުރުވުމާ، (އިހުތިޔާރުން ބޭރުން) ދަރިން ނުލިބޭ ގޮތް ހެދުން ފަދަ އަމަލުތައް ހިންގަމުންދާކަން ފާހަގަކުރަންޖެހެއެވެ.
ޗައިނާއާ ދެކޮޅަށް ތެދުވި ގައުމުތަކަށް ރައްދު ދެއްވަމުން ޗައިނާގެ އދގެ ސަފީރު ޝާންގް ޖުން ވިދާޅުވީ، މި ތުހުމަތުތަކަކީ އެއްވެސް އަސާސެއް ނެތް ތުހުމަތުތަކެއް ކަމަށެވެ. އަދި މިއީ އދގެ މެމްބަރު ގައުމުތަކުގެ މެދުގައި ރުޅިވެރިކަން އުފެއްދުމުގެ މަގުސަދުގައި ކުރި ކަމެއް ކަމަށްވެސް ޗައިނާގެ ސަފީރު ވަނީ ސިފަކުރައްވާފައެވެ.
ޝާންގް ވިދާޅުވީ ދޮގު މައުލޫމާތާއި ސިޔާސީ ވައިރަހުގެ ސަބަބުން ޗައިނާއަށް އަސަރުތަކެއް ފޯރާ، ދާހިލީ ކަންކަމުގެ ތެރެއަށް ވެސް ވަދެގެންފައި ވާ ކަމަށެވެ.
ޝީންޖިއާންގްގެ މައްސަލާގައި ޗައިނާގެ ދިފާއުގައި، ކިއުބާ އިސްވެ އޮވެ، ގަރާރެއް އެކުލަވާލި މަންޒަރުވެސް ވަނީ ފެނިގެން ގޮސްފައެވެ. ކިއުބާއިން އެކުލަވާލި ގަރާރަށް 45 ގައުމަކުން ވަނީ ތާއީދު ކޮށްފައެވެ. ހޮންގްކޮންގްގެ މައްސަލާގައި ޗައިނާގެ ދިފާއަށް ތެދުވެ، ބަޔާނެއް އެކުލަވާލި ޕާކިސްތާނުންނެވެ.
