ކޮވިޑް-19 އަށް މާލެ ސިޓީން ޕޮޒިޓިވްވި މީހުންގެ ތެރެއިން މިހާތަނަށް އެންމެ ގިނަ މީހުން ޕޮޒިޓިވްވެފައި ވަނީ މާފަންނުން ކަަމަށް ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފިއެވެ.
އެޗްއީއޯސީގެ ނޫސްވެރިންގެ ބައްދަލުވުމުގައި ޓެގް ޓީމުގެ ފަރާތުން ބައިވެރިވެވަޑައިގެން ޑރ. އަހްމަދު ޝަހީދު ވަނީ މާލޭގައި ބަލި ފެތުރެމުން އައި ގޮތުގެ ވީޑިއޯއެއް މާލޭ މެޕުން ދައްކާލާފައެވެ. އެއިން ދައްކާ ގޮތުގައި އެންމެ ގިނަ މީހުން ޕޮޒިޓިވްވެފައި ވަނީ މާފަންނުންނެވެ.
މި ވީޑިއޯގައި ވަނީ ޖުލައި މަހުގެ ނިޔަލަށް މާލޭގައި ކޮވިޑް ފެތުރިފައިވާ މިންވަރު ވަކިން އަދި އޮގަސްޓްމަހު ފެތުރެމުންދާ މިންވަރު ވަކިން ފާހަގަ ކޮށްފައެވެ.
ދަނބު ކުލައިން ފާހަގަކޮށްފައި ވަނީ ޖުލައި މަހުގެ ނިޔަލަށް ފެތުރުނު މިންވަރެވެ. އަދި ރަތް ކުލައިން ފާހަގަކޮށްފައި ވަނީ އޮގސްޓްމަހު ފެތުރުނު މިންވަރެވެ. މި މެޕުން އެކި ކުލަތައް މައްޗަށް ދާތަން ފެންނައިރު، އެއީ އެއް ގޭބިސީއަކުން އިތުރުވާ މީހުން ކަމަށް ޑރ. ޝަހީދް ވިދާޅުވިއެވެ. މި މެޕުން ޖުލައި މަހަށް ވުރެ ބާރު ސްޕީޑުގައި އޮގަސްޓުގައި ބަލި ފެތުރިފައިވާކަން އެނގެއެވެ.
އޭނާ ވިދާޅުވީ، މިހާރު މާލޭގައި ބަލި ނުފެތުރޭ ސަރަހައްދެއް ނެތް ކަމަށެވެ. ހަމައެއާކު، މާލެއާ އަޅާބަލާ، ހުޅުމާލެ އަދި ވިލިމާލޭގައި ބަލި ފެތުރުނު މިންވަރު ދަށް ކަމަށް ޑރ. ޝަހީދް ވިދާޅުވިއެވެ.
މިހާތަނަށް އައިއިރު، 7047 މީހަކު މި ބައްޔަށް ޕޮޒިޓިވްވެފައިވާއިރު، 4439 މީހަކު ބަލިން ރަނގަޅުވެ، 28 މީހަކު ވަނީ މި ބަލީގައި ނިޔާވެފައެވެ. މިހާރު މި ބައްޔަށް ފަރުވާ ކުރަމުންދަނީ 2580 މީހެކެވެ. އޭގެ ތެރެއިން 1460 މީހަކު އައިސޮލޭޝަން ފެސިލިޓީތަކުގައި ތިބިއިރު 173 މީހަކު ވަނީ ހޮސްޕިޓަލުގައެވެ.
