އެންމެ ފުރަތަމަ ފައްޅިއެއްގެ ގޮތުގައި ބޭނުންކޮށް، މިސްކިތަކަށް ބަދަލު ކުރުމަށްފަހު ދާރުލް އާސާރެއްގެ ގޮތުގައި ބޭނުން ކުރަމުންދިޔަ އިތުރު ބިނާއަކަށް، ތުރުކީވިލާތުގެ ރައީސް ރަޖަބު ތޮއްޔިބު އުރުދުގާން، އަނެއްކާވެސް މިސްކިތެއްގެ ދަރަޖަ ދެއްވައިފިއެވެ.
ކޯރާ މިއުޒިއަމްއަށް މިސްކިތެއްގެ ދަރަޖަ ދެއްވާފައިވާ މިވަނީ، ހަމަ މިފަދަ ގޮތަކަށް އޮތް ހާޔާ ސޯފިއާއަށް މިސްކިތެއްގެ ދަރަޖަ ދެއްވާ، އެ ތަނުގައި ނަމާދު ކުރަން ފެށިތާ މަހެއްހާ ދުވަހުގެ ތެރޭގައެވެ.
1000 އަހަރުވެފައިވާ ކޯރާ މިއުޒިއަމް އަކީ ބީޒަންޓީނުންގެ ދުވަސްވަރު ބިނާކުރި ފައްޅިއެކެވެ. އުސްމާނީ ދައުލަތުން ހޯދި ނަސްރާއެކު ބައި ގަރުނުފަހުން މި ތަން، ކާރިޔޭ މިސްކިތަށް ބަދަލު ކުރިއެވެ. އޭގެ ފަހުން، ދާރުލް އާސާރަކަށް މި މިސްކިތް ބަދަލު ކުރީ 2 ވަނަ ބޮޑު ހަނގުރާމައަށް ފަހުގައެވެ.
ކޯރާ މިއުޒިއަމް، އަލުން އަނބުރާ މިސްކިތެއްގެ ގޮތުގައި ބޭނުން ކުރުމަށް ތުރުކީވިލާތުގެ އިދާރާއީ އެންމެ މަތީ ކޯޓުން ހުއްދަ ދިނީ ނޮވެމްބަރު މަހު ކަމަށް މައުލޫމާތު ލިބެއެވެ.
ހާޔާ ސޯފިއާ މިސްކިތަކަށް ބަދަލުކުރުމާއެކު ތުރުކިވިލާތުގައި ހިޔާލު ތަފާތު ވުންތައް އުފެދުނު ފަދައިން މިފަހަރުވެސް އެގައުމުގައި ވަނީ ހިޔާލު ތަފާތުވުންތައް އުފެދިފައެވެ.
މިއަދު އުރުދުގާން، މިސްކިތެއްގެ ދަރަޖައަށް ބަދަލު ކުރެއްވި ކޯރާ މިއުޒިއަމްގައި ނަމާދު ކުރަން ފަށާނެ ތާރީހެއް އަދި ސާފެއް ނުވެއެވެ.
