ކޮވިޑާ ގުޅިގެން ރާއްޖޭގައި މިހާރު އޮތް ލޮކްޑައުންގެ ހާލަތަށް ލުއި ދިނުމަށްޓަކައި އެކުލަވާލައިވާ ނިއު ނޯމަލް ނުވަތަ އާ އާންމު ހާލަތުގައި އަމަލުކުރަންޖެހޭނެ އުސޫލުތަކުގެ ދެލިކޮޕީ ހަދައިފި ކަމަށާއި، ފައިނަލް ކުރެވި ދެތިން ދުވަސްތެރޭ އިއުލާން ކުރައްވާނެ ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެއެވެ.
ޕީއެސްއެމަށް ދެއްވި ބަސްދީގަތުމެއްގައި އަމީން ވިދާޅުވީ، ނިއު ނޯމަލްގެ އަސާސީ ޑޮކިއުމަންޓް އެކުލަވާލައިފައި ވަނީ ޑޮކްޓަރުންނާއި ކަމާގުޅޭ އިދާރާތަކުގެ މަޝްވަރާ ތަކަށް ފަހު ކަމަށެވެ. އަދި މާދަމާ އެ އުސޫލުތަކާ މެދު ޕޮލިސީ ލެވެލްގައި މަޝްވަރާ ކުރައްވައި ކުރިއަށް އޮތް ދެތިން ދުވަހަސް ތެރޭ އެފިޔަވަޅުތައް އާއްމު ކުރައްވާނެ ކަމަށެވެ.
އަމީން ވިދާޅުވީ، ނިއު ނޯމަލްގެ ހާލަތުގައި ވިސްނުން ބަހައްޓަވާނެ ކަންތައްތަކުގެ ތެރެއިން އެއް ކަމަކި ހޮސްޕިޓަލް ތަކަށް ދައްކަން ދާ މީހުންގެ އަދަދު ގިނަ ވެދާނެތީއާއި، އެކިއެކި ބަލިތަކަށް ފަރުވާ ހޯދާ މީހުންގެ އަދަދު އިތުރު ވެދާނެ ކަމަށް ބައްލަވައި ޑޮކްޓަރަށް ދައްކަން ހޮސްޕިޓލަށް ދާނެ ގޮތްތަކާއި ފުލޫ ކްލިނިކް ތަކަށް ޑޮކްޓަރަށް ދެއްކޭނެ ގޮތްތައް ކަނޑައެޅުން ކަމަށެވެ.
މިނިސްޓަރު ވިދާޅުވީ ހޮސްޕިޓަލްތަކުން ބޮޑަށް އިސްކަން ދޭނީ ކޮވިޑް-19 ފިޔަވައި ކޮންމެހެން ދޭންޖެހޭ ޚިދުމަތް ތަކަށާއި ކުއްލި ހާލަތުގައި ހިދުމަތް ދޭން ޖެހޭ ކަންތައްތަކަށް ކަމަށެވެ.
އައު އުސޫލުގައި ހިމެނޭ ހުރިހާ ކަމެއްގެ ތަފްސީލެއް މިނިސްޓަރު ނުދެއްވައެވެ. ނަމަވެސް އާ އާމްނު ހާލަތުގައި، ގައިދުރުކަމަށް އިސްކަން ދިނުމަކީ ކޮންމެހެން ކުރަން ޖެހޭ ކަމެކެވެ.
މިހާރު އޮތް ލޮކްޑައުން ނުވަތަ ފުރަބަންދު ނިމޭ އިރު ލިއުތަކެއް ދެއްވާނެ ކަަމަށް ރައީސް އިބްރާހިމް މުހައްމަދު ސޯލިހުވެސް ވަނީ ވިދާޅުވެފައެވެ. އެގޮތުން ގެއިން ނުކުތުމާއި، ވިޔަފާރި ކުރުމަށް ފިހާރަތަކަށް ދިއުމާއި މިސްކިތްތަކަށް ނަމާދަށް ދިއުމުގެ އިތުރުން ސައި ހޮޓާ ރެސްޓޯރަންޓް ތަކާއި ސްކޫލުތަކާއި އޮފީސްތައްވެސް ހުޅުއްވާ ލައްވާނެ ކަމަށެވެ. ނަމަވެސް އެއިން ކޮންމެ ކަމެއްވެސް ކުރައްވާނީ މަރުހަލާތަކަކަށް ބައްސަވާލައްވައިގެން ކަމަށެވެ.
ރައީސް ވިދާޅުވީ، މިއިން ކޮންމެ ކަމަކަށްވެސް ލުއިތަކެއް ދެއްވާނީ ވަކިވަކި އިންތިޒާމްތަކެއްގެ ދަށުން ކަމަށާއި، އެ ލުއިތަކާ ގުޅޭ ތަފްސީލު ކުރިއަށް އޮތް ތަނުގައި ސަރުކާރުން ދެމުން ގެންދާނެ ކަމަށެވެ.
ރައީސް އިތުރަށް ވިދާޅުވީ، މި ލުއިތަކުގެ ތެރެއިން ރާއްޖޭގެ ރިސޯޓުތައްވެސް ހުޅުވާލައްވަން ނިންމަވާފައި ވާކަމަށެވެ. އަދި އެއާޕޯޓުވެސް ހުޅުވާލުމާއި، ފަތުރުވެރިންނަށް ރާއްޖެ އާދެވޭނެ ގޮތްތައް ހަމަޖައްސަވާނެ ކަމަށް ވިދާޅުވިއެވެ.
