ކޮރޯނާވައިރަސް ޑިޒީޒް (ކޮވިޑް-19) ފެތުރުން ކޮންޓްރޯލް ކުރުމުގެ ގޮތުން ބޭރަށް ނިކުމެ އުޅުމާ އެފަދަ ހަރަކާތްތައް މަޑުޖައްސާލުމަށް އެގައުމުގައި އިއުލާންކޮށްފައިވާ މޫވްމަންޓް އޯޑާ ކޮންޓްރޯލްގެ މުހުލަތު އަނެއްކާވެސް އިތުރުކޮށްފިއެވެ.
މެލޭޝިއާގެ ސަރުކާރު ޚަބަރު ފަތުރާ ބެރްނާމާ ނިއުސް އޭޖެންސީއާ ހަވާލާދީ ބައިނަލްއަގުވާމީ މީޑިއާއިން ރިޕޯޓްކުރާ ގޮތުގައި، މިމަހުގެ 28ގެ ނިޔަލަށް މޫވްމަންޓް ކޮންޓްރޯލް އޯޑަރުގެ މުހުލަތު އިތުރު ކުރައްވާ، ބޮޑުވަޒީރު މުހްޔިއްދީން ޔާސީންވަނީ އެކަން އިއުލާންކުރައްވާފައެވެ.
ބެރްނާމާއިން ރިޕޯޓްކުރާ ގޮތުގައި، މާޗް 18 ވަނަ ދުވަހު އިއުލާންކުރި އަމުރުގެ މުހުލަތު އިތުރު ކުރުމަކީ، ކޮވިޑް-19އާ ދެކޮޅަށް ހަނގުރާމަކުރަމުންދާ ސިއްހީ ހިދުމަތްތެރިންނަށް އެމީހުންގެ މަސައްކަތައިގެން ކުރިއަށް ދިއުމަށް އިތުރު ފުރުސަތުތަކެއް ތަނަވަސްކޮށްދޭނެ ކަމެކެވެ. އަދި މިއީ މެލޭޝިއާގައި ބަލިމަޑުކަމުގެ ހުޅު އިތުރަށް ފަޅައިގެން ދިއުން ކޮންޓްރޯލް ވެގެންދާނެ ފިޔަވަޅެއްކަންވެސް ވަނީ ފާހަގަކޮށްފައެވެ.
މެލޭޝިއާގައި މިހާރު ތަންފީޒުކުރަމުންދާ މޫވްމަންޓް ކޮންޓްރޯލް އޯޑަރާއެކު މެލޭޝިއާގެ ރައްޔިތުންނަށްވެސް އެގައުމުން ފުރައިގެން ނުދެވޭ ގޮތް ވަނީ ހަދާފައެވެ. މީގެ އިތުރުން އިޖުތިމާއީ، ދީނީ އަދި އިލްމީ އެއްވުންތައް ބޭއްވުންވެސް އޮތީ މަނާކޮށްފައެވެ. މޫވްމަންޓް ކޮންޓްރޯލް އޯޑަރުގެ ދަށުން ލޮކްޑައުންކޮށްފައިވާ މެލޭޝިއާގައި ދިރިއުޅޭ އެހެން ގައުމުތަކުގެ ރައްޔިތުންނާ ވަޒަންވެރިންވެސް މިއަމުރުތަކަށް ކިޔަމަންވާންޖެހެއެވެ.
މެލޭޝިއާގެ މިހާރުގެ ހާލަތަށް ބަލާއިރު، އެގައުމުން ކޮވިޑް-19އަށް ޕޮޒިޓިވްވި މީހުންގެ އަދަދު 4228 އަށް ވަނީ އަރާފައެވެ. މެލޭޝިއާއިން ކޮވިޑް-19އަށް ޕޮޒިޓިވްވި މީހުންގެ ތެރޭގައި ދިވެއްސަކުވެސް ހިމެނެއެވެ. އެމީހާގެ ހާލު ރަނގަޅުކަމަށް، ކަމާބެހޭ ފަރާތްތަކުން ވަނީ ހާމަކޮށްފައެވެ.
ކޮވިޑް-19ގެ ޝިކާރައަކަށްވެ، މެލޭޝިއާއިން މަރުވި މީހުންގެ އަދަދު 67 ވަނީ އަރާފައެވެ.
