ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) ކޮންޓްރޯލް ކުރުމަށް މެލޭޝިއާއިން އަޅަމުންދާ ފިޔަވަޅުތަކުގެ ތެރެއިން، އެގައުމުގައި މިހާރު އިއުލާންކޮށްފައިވާ މޫވްމަންޓް ކޮންޓްރޯލް އަމުރު (އެމް.ސީ.އޯ)ގެ މުއްދަތު، އޭޕްރިލް 14ގެ ނިޔަލަށް އިތުރުކޮށްފިއެވެ.
އެމް.ސީ.އޯގެ މުއްދަތު އަދި 2 ހަފުތާގެ މުއްދަތަށް އިތުރުކުރާނެކަން އިއުލާންކުރެއްވީ މެލޭޝިއާގެ ބޮޑުވަޒީރު މުހްޔިއްދީން ޔާސީންއެވެ.
ޓީވީ މެދުވެރިކުރައްވާ ގައުމާ މުހާތަބުކުރައްވަމުން ބޮޑުވަޒީރު މުހްޔިއްދީން ވިދާޅުވީ، މިހާރުގެ މަސްރަހާ ބެހޭ ގޮތުން ސިއްހަތާ ބެހޭ ވުޒާރާއާއި ގައުމީ ސަލާމަތާ ބެހޭ ކައުންސިލުން އޭނާއަށް މައުލޫމާތު އަރުވާފައިވާކަމަށާ، ލިބެމުންދާ އެންމެ ފަހުގެ މައުލޫމާތަށް ބަލާއިރު މެލޭޝިއާއިން ކޮވިޑް-19 ކޭސްތައް ފެންނަ މިންވަރު އިތުރުވެގެންދާނެ ކަމަށެވެ.
އެއްދުވަހުން އަނެއް ދުވަހަށް ހާލަތު ގޯސްވަމުންދާއިރު އެމް.ސީ.އޯގެ މުހުލަތު އިތުރުމަކީ މި ނުރައްކާތެރި ކަމުން ސަލާމަތްވެވެން އޮތް ހަމައެކަނި ގޮތް ކަމަށްވެސް ބޮޑުވަޒީރު މުހްޔިއްދީން ވަނީ ފާހަގަކުރައްވާފައެވެ. އަދި ދުރާލާ މިކަން އިއުލާންކުރެއްވީ، ކުއްލި ގޮތަކަށް މިކަން އިއުލާން ކުރުމުން އާންމުންގެ މެދުގައި ނުތަނަވަސްކަމާ ހާސްކަން އުފެދިދާނެތީ ކަމަށްވެސް މެލޭޝިއާގެ ބޮޑުވަޒީރު ވަނީ ވިދާޅުވެފައެވެ.
ބޮޑުވަޒީރު މުހްޔިއްދީން ވިދާޅުވީ ދިގު މުއްދަތަކަށް ގޭގައި ތިބުމަކީ ފަސޭހަ ކަމެއް ނޫންކަމަށާ، އެކަމުގައި ބޮޑެތި ގޮންޖެހުންތަކެއް ހުންނާނެކަމަށް ގަބޫލުކުރައްވާކަމަށެވެ. ނަމަވެސް ގަބޫލުކުރަންޖެހިފައިވާ ހަގީގަތަކީ، އަދު މިދެކޭ ކަންކަމަކީ މާޒީގައި ތަޖުރިބާކޮށްފައިވާ ކަމަކަށް ނުވާ ކަން ކަމަށާ، މިކަމަކީ ވީ އެންމެ އަވަހަކަށް އެކަމަކުން އަރައިގަތުމަށް އެންމެންވެސް ބޭނުންވާނެ ކަމެއް ކަމަށްވެސް މެލޭޝިއާގެ ބޮޑުވަޒީރު ވަނީ ވިދާޅުވެފައެވެ.
މާޗް 18 ވަނަ ދުވަހުން ފަށައިގެން މެލޭޝިއާގައި އެމް.ސީ.އޯ އަމުރު އިއުލާންކޮށް މުޅި ގައުމު ލޮކްޑައުންކޮށްފައިވާ މުހުލަތު ކުރިން ހަމަވާން އޮތީ މާޗް 31ގެ ނިޔަލަށެވެ. ނަމަވެސް މި މުއްދަތު ހަމަވާ ތާރީހުން ފެށިގެން އިތުރު ދެ ހަފުތާއަށް އަމުރުގެ މުއްދަތު މިވަނީ އިތުރުކޮށްފައެވެ. މި ގަވައިދާ ހިލާފުވާ ފަރާތްތައް 1000 މެލޭޝިއާ ރިންގެޓުން ޖޫރިމަނާކޮށް 6 މަސްދުވަހަށް ޖަލަށް ލުމުގެ ބާރު، މެލޭޝިއާގެ ކަމާބެހޭ ފަރާތްތަކަށް އޮވެއެވެ.
