ވެލާނާ އިންޓަނޭޝަނަލް އެއާޕޯޓު (ވީއައިއޭ) ޑިސްއިންފެކްޓު ކުރުމުގެ މަސައްކަތް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީލް) އިން ފަށައިފިއެވެ.
އެމްއޭސީލް އިން ކޮށްފައިވާ ޓްވީޓެއްގައި ބުނީ ނުރައްކާތެރި ކޮވިޑް19 ވައިރަސް އަށް ރައްކާތެރިވުމުގެ ގޮތުން ކުރާ މަސައްކަތުގެ ތެރެއިން ވީއައިއޭގެ މަގުތަކުގައި އެހެނިހެން ސަރަހައްދުތައް ޑިސްއިންފެކްޓު ކުރުމުގެ މަސައްކަތް ފަށާފައިވާ ކަމަށެވެ.
ވީއައިއޭ ޑިސްއިންފެކްޓު ކުރުމުގެ މަސައްކަތް ފެށިއިރު ކޮވިޑް19އިން ރައްކާތެރިވާން ކުރަމުން އަންނަ މަސައްކަތުގެ ތެރެއިން މާލޭގެ މަގުތައް ކުލޮރިން އަޅައިގެން ދޮވެ ސާފުކުރުމުގެ މަސައްކަތް ވެސް ވަނީ ފަށާފައެވެ. މާލޭގެ މަގުތައް ޑިސްއިންފެކްޓް ކުރުމުގެ މަސައްކަތް ކުރަމުން ދަނީ އެމްއެންޑީއެފްއާއި މާލެސިޓީ ކައުންސިލް ގުޅިގެން ނެވެ.
ސަރުކާރުން ދަނީ ކޮވިޑް19 އިން ރައްކާތެރި ވުމަށް ގިނަ މަސައްކަތް ތަކެއް ކުރަމުންނެވެ. އެގޮތުން އާންމުން އެއްވެ އުޅުން މަދުކުރުމާއި، ޕާކްތަކާއި މައިޒާންތައް ބަންދުކޮށް ކެފޭ ރެސްޓޯރެންޓްތައް ވެސް ވަނީ ބަންދުކޮށްފައެވެ. އަދި ރައްކާތެރި ކަމުގެ ފިޔވަޅެއްގެ ގޮތުން ބޭރު ގައުމުތަކުން ރާއްޖެ އަންނަ މީހުން ކަރަންޓީނު ކުރުމާއި ޓެސްޓްކުރުން ފަދަ ކަންކަން އަންނަނީ ކުރަމުންނެވެ.
ރާއްޖެއިން މިހާތަނަށް 13 މީހަކު ޕޮޒިޓިވް ވެފައި ވާއިރު، އޭގެތެރެއިން ތިން މީހަކު ރަނގަޅު ވެފައިވާކަން ސަރުކާރުން ވަނީ ހާމަކޮށްފައެވެ. މި ބަލިން ރަނގަޅުވެފައިވާ ތިން މީހުންނަކީ ސޭންޑީސް ބަތަލާ ރިސޯޓުން ބައްޔަށް ޕޮޒިޓިވް ވި އިޓަލީގެ ދެމަފިރިންގެ އިތުރުން ކުރެއްދޫ އިން ޕޮޒިޓިވްވި މީހެކެވެ.
