އާއްމު ސިއްހަތުގެ ކުއްލި ނުރައްކަލުގެ ހާލަތު ނިމެންދެން ޗެނަލް13 އިން ގެނެސްދޭ "މަޑިސީލަ" ޕްރޮގްރާމް މެދުކަނޑާލުމަށް ބްރޯޑްކާސްޓިން ކޮމިޝަން (ބްރޯޑްކޮމް) އިން އެ ޗެނަލް ހިންގާ މީޑިއާ ރިންގް ޕްރައިވެޓު ލިމިޓެޑަށް އަންގައިފިއެވެ.

ކޮވިޑް19 އާ ގުޅިގެން ރޭ ޗެނަލް13 ގެ "މަޑިސީލަ" ޕްރޮގްރާމުގައި ދަރުމަވަންތަ ހޮސްޕިޓަލުގައި ކޮވިޑް19 އަށް ޕޮޒިޓިވް ވެފައިވާ ދިވެއްސަކު އޮތް ކަމަށާއި އެކަން ހާމަ ކުރުމަށް ދިޔައީ ސަރުކާރަށް ގޮވާލަމުންނެވެ. އެކަމުގެ ސަބަބުން ސޯޝަލް މީޑިއާގައި ގިނަ ބަޔަކު ދިޔައީ ކަންބޮޑުވުންފާޅު ކުރަމުންނެވެ. އަދި ސަރުކާރު ހިންގާ މައިޕާޓީ އެމްޑީޕީގެ ބައެއް މަޖިލިސް މެންބަރުން ވަނީ ބްރޯޑްކޮމް ޓެގުކޮށް ދޮގު ހަބަރު ފަތުރާ ފަރާތްތަކުގެ މައްސަލަތައް ބެލުމަށް ގޮވާލަމުންނެވެ.

އެ މައްސަލަ ބެލުމަށްފަހު ބްރޯޑްކޮމް އިން އާއްމުކުރި މައްސަލަ ނިންމި ގޮތުގެ ރިޕޯޓުގައި ބުނެފައިވަނީ އެ މައްސަލަ ތަހުގީގު ކުރިޔަށް ދިޔައިރު ޗެނަލް13 އަށް ވެސް މައްސަލާގައި ޖަވާބުދާރީވުމުގެ ފުރުސަތު ދީފައިވާ ކަމަށެވެ. އަދި އެ ފުރުސަތުގައި "މަޑިސީލަ" ޕްރޮގްރާމުގައި އެވާހަކަތައް ދެއްކީ ލިބުނު މުއުތަބަރު މައުލޫމާތުތަކެއްގެ މައްޗަށް ބިނާކޮށް ކަމަށް އެ ޗެނަލުން ބުނެފައިވާ ކަމަށް ބްރޯޑްކޮމް އިން ބުންޏެވެ.

ނަމަވެސް ބްރޯޑްކޮމްއިން ބުނީ ކޮވިޑް19 އާ ގުޅިގެން މައުލޫމާތު ގެނެސްދިނުމުގައި ބޭނުންކުރަންވާނީ ދައުލަތުގެ ކަމާބެހޭ އިދާރާތަކުން ކަށަވަރުކޮށްދީފައިވާ ސައްހަ މަޢުލޫމާތުތަށް ކަމަށް އެ ކޮމިޝަނުން މި މަހުގެ 16ވަނަ ދުވަހު ބަޔާންކޮށްފައި އޮތްއިރު "މަޑިސީލަ" ޕްރޮގްރާމް އިން ކޮވިޑް19 އާ ގުޅޭ ވާހަކަތައް ގެނެސްދީފައިވަނީ ދައުލަތުގެ ކަމާ ބެހޭ އިދާރާއިން މައުލޫމާތުގެ ސައްހަކަން ކަށަވަރު ނުކޮށް ކަމަށެވެ. އެހެންކަމުން އެ ޗެނަލް ވަނީ ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްގެ ފަސްވަނަ ހަމައިގެ 4 ވަނަ ނަންބަރު އާ ހިލާފުވެފައި ކަމަށް ބްރޯޑްކޮމް އިން ބުންޏެވެ.

އެހެންކަމުން މިއަދުން ފެށިގެން އާންމު ސިއްހަތުގެ ކުއްލި ނުރުއްކަލުގެ ހާލަތުގެ މުއްދަތަށް އުނިކުރުމަށާއި އަދި އެ މުއްދަތުގައި ރާއްޖޭގެ އާންމު ސިއްހީ ނުރައްކަލުގެ މިހާލަތުގައި ކޮވިޑް 19 އާ ގުޅިގެން ދައުލަތުގެ ކަމާބެހޭ އިދާރާތަކުން ހާމަކުރާ މައުލޫމާތު ފިޔަވައި އެހެން އެއްވެސް މައުލޫމާތެއް ޗެނަލް13 އިން ބްރޯޑްކާސްޓްކުރާ ޕްރޮގްރާމުތަކުގައި ނުހިމެނުމަށް ބްރޯޑްކޮމް އިން ވަނީ ޗެނަލް13 ހިންގާ މީޑިއާ ރިންގް ޕްރައިވެޓް ލިމިޓެޑަށް އަންގާފައެވެ.

ކޮވިޑް19 އާ ގުޅިގެން ދޮގު މައުލޫމާތުތައް ފެތުރެމުން އަންނާތީ ސަރުކާރުން ވަނީ އެކަމަށް ހާއްސަކޮށް ރައީސް އޮފީހުގެ އަންޑަ ސެކްރެޓަރީ މުހައްމަދު މަބްރޫކް އަޒީޒް ކޮވިޑް19 ގެ މައުލޫމާތު ދިނުމުގެ ތަރުޖަމާނަކަށް ހަމަޖައްސާފައެވެ. އަދި އޭނާ އަންނަނީ ކޮންމެ ދުވަހެއްގައި ވެސް މެންދުރުފަހާއި ރޭގަނޑު ނޫސްވެރިންނާއި ބައްދަލުކޮށް ކޮވިޑް19 ގެ އެންމެ ފަހުގެ މައުލޫމާތުތައް ހިއްސާ ކުރަމުންނެވެ.

މިއަދާއި ހަމައަށްވެސް ކޮވިޑް19 އިން ރާއްޖެއިން ޕޮޒިޓިވް ވެފައިވަނީ 13 މީހުންނެވެ. އެ މީހުންގެ ތެރޭގައި އެއްވެސް ދިވެއްސަކު ނުހިމެނެއެވެ. އެ މީހުންގެ ތެރޭގައި ހިމެނެނީ ރިސޯޓުތަކުގައި މަސައްކަތް ކުރާ ބިދޭސީންނާއި ރާއްޖެއަށް ޗުއްޓީ ހޭދަ ކުރުމަށް އައިސް ތިބި ފަތުރުވެރިންނެވެ.

ހަބަރު ބްރޮޑްކޮމް ކޮވިޑް-19