ވިލިމާލޭގައި ހުންނަ ކުޑަކުދިންގެ ހިޔާގެ ސީއީއޯ މަގާމުގެ މަސްއޫލިއްޔަތުތަކުން އެކަހެރިކުރި އަބްދުއްޝުކޫރު އަބްދުލް ހަކީމް ޖެންޑާ މިނިސްޓްރީގެ ނައިބަކަށް އައްޔަންކޮށްފިއެވެ.
ރައީސް އޮފީހުން ބުނީ، ޖެންޑާ މިނިސްޓްރީގެ ނައިބުގެ މަގާމަށް ޝުކޫރު އައްޔަން ކުރީ މިއަދު ކަމަށެވެ. އަދި އެ މަގާމަށް އައްޔަން ކުރެއްވުމުގެ ކުރިން ޝުކޫރު ހުންނެވީ ކުޑަކުދިންގެ ހިޔާގެ ސީއީއޯގެ މަގާމުގައި ކަމަށް ރައީސް އޮފީހުން ބުނެއެވެ.
ހިޔާގެ ސީއީއޯގެ މަގާމުން ޝުކޫރު އެކަހެރިކުރީ ހިއުމަން ރައިޓްސް ކޮމިޝަން (އެޗްއާރުސީއެމް) އިން ބަލަމުންދާ މައްސަލައަކާއި ގުޅިގެންނެވެ. އެ މަސައްކަތުން އޭނާ އެކަހެރި ކުރި ނަމަވެސް އޭނާ މިނިސްޓްރީގެ މަސައްކަތްތަކަށް ނުކުންނަވައެވެ.
ޝުކޫރާއެކު ޖެންޑާ މިނިސްޓްރީގައި މިވަގުތު ހަތަރު ނައިބުން ތިއްބަވާނެއެވެ.
