ވެރިކަން ކުރާ މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ދަފްތަރު ސައްހަ ނޫން ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
ޑރ. ޖަމީލު ކުރެއްވި ޓުވީޓުގައި ވިދާޅުވެފައިވަނީ، އެމްޑީޕީގެ ދަފްތަރު ސައްހައެއް ނޫންކަމަށާއި، ވެރިކަމުގެ ބާރާއި ނުފޫޒް ބޭނުންކޮށްފައިވާކަން މިކަމުންވެސް ރަނގަޅަށް ހާމަވެފައިވާ ކަމަށެވެ.
މީގެއިތުރަށް ޖަމީލް ވިދާޅުވީ ރައްޔިތުންނަށް އޮޅުވާލައިގެން ޕާޓީއަށް ވެއްދުމުގައި ގިނަ އިދާރާތަކެއްގެ ބައިވެރިވުން އެބައޮތް ކަމަށާއި، މިއީ ފުރިހަމަ ތަހުގީގެއްކޮށް، ފިޔަވަޅު އަޅަންޖެހޭ ޖިނާއީ ކުށުގެ އަމަލެއް ކަމަށެވެ.
އޭނާ މިހެން ވިދާޅުވީ، ޕީޕީއެމްގެ ގިނަ މެމްބަރުންތަކެއްގެ ނަން އެމްޑީޕީގެ ދަފްތަރުގައި ހިމަނާފައިވާ މައްސަލަ އެއް ފެންމަތިވެ ޕީޕީއެމްގެ މެންބަރުންތައް އެކެމާއި މެދު ކަންބޮޑުވުން ފާޅުކުރައްވާފައި ވަނިކޮށެވެ.
އެކަން ހާމަކޮށް ށ.މިލަންދޫ ދާއިރާގެ ކުރީގެ މެންބަރު އަބްދުﷲ މުފީދު ވިދާޅުވެފައި ވަނީ އެބޭފުޅާ އަކީ އެމްޑީޕީ މެންބަރެއް ނޫން ކަމަށާއި، އެހެން ނަމަވެސް، އެމްޑީޕީ އިން އެކުލަވާލާފައިވާ ދަފްތަރުގައި އެބޭފުޅާގެ އިތުރުން މިލަންދޫގެ ޕީޕީއެމް ގިނަ މެންބަރުންތަކެއްގެ ނަން ހިމަނާފައިވާ ކަމަށެވެ.
މީގެ އިތުރުން، ނިލަންދޫ ދާއިރާގެ ކުރީގެ މެންބަރު ޑރ. އަބްދުﷲ ހަލީލް އާއި ދިއްދޫ ދާއިރާގެ ކުރީގެ މެންބަރު އަބްދުލް ލަތީފްގެ ނަންވެސް އެމްޑިޕީ ދަފްތަރުގައި އޮތް މައްސަލަ ވަނީ ފެންމަތިވެފައެވެ.
