ރައީސް އިބްރާހިމް މުހައްމަދު ސޯލިހް އިންޑޮނީޝިއާގެ ރައީސަށް ހަމްދަރުދީގެ މެސެޖެއް ފޮނުއްވައިފިއެވެ.
ރައީސް ސޯލިހް އިންޑޮނީޝިއާގެ ރައީސް ޖޯކޯ ވިޑޯޑޯއަށް ހަމްދަރުދީގެ މެސެޖެއް ފޮނުއްވީ، އިންޑޮނީޝިއާގެ ޖަކާޓާގައި ފެންބޮޑުވެ އެތައް ބަޔަކު މަރުވެ، ގިނަ ބަޔަކަށް އަނިޔާވެ، ހާލުގައިޖެހި، އާންމުންގެ ގެދޮރަށާއި ތަކެއްޗަށް ބޮޑެތި ގެއްލުންތައް ލިބުމާ ގުޅިގެން، އެކަމުގެ ހިތާމައިގައެވެ.
ރައީސް ސޯލިހް ފޮނުއްވި ހަމްދަރުދީގެ މެސެޖުގައި، ގައުމީ ހިތާމައިގެ މިދަނޑިވަޅުގައި، ދިވެހި ސަރުކާރާއި، ރައްޔިތުންނާއި، ރައީސް ސޯލިހްގެ އަމިއްލަ ނަންފުޅުގައި، މި ހާދިސާގައި ފުރާނަ ގެއްލުނު މީހުންގެ އާއިލާތަކާއި ހާލުގައި ޖެހިފައިވާ ފަރާތްތަކާއި އަދި އިންޑޮނީޝިއާގެ ސަރުކާރަށާއި އާންމު ރައްޔިތުންނަށް އިހްލާސްތެރިކަމާއެކު ހަމްދަރުދީ ފޮނުއްވާފައިވެއެވެ.
ރައީސް ސޯލިހްގެ މެސެޖުގައި، މި ހާދިސާގެ ސަބަބުން ލިބުނު ގެއްލުންތަކުން އަރައިގަތުމަށް ކުރެވެމުންދާ މަސައްކަތުގައި ކާމިޔާބީއަށް އެދިވަޑައިގެންފައި ވެއެވެ.
އިންޑޮނޭޝިއާއަށް މިދިޔަ އަންގާރަ ދުވަހުން ފެށިގެން ކުރަމުންދާ ވިއްސާރައިގައި ވެރިރަށް ޖަކާޓާގައި ފެންބޮޑުވެ ހިނގި ހާދިސާތަކާއި ބޯކޮށް ވާރޭވެހި ބިންގަނޑު ކަނޑައިގެންގޮސް ހިނގި ހާދިސާތަކުގައި މިހާތަނަށް 65 މީހަކު މަރުވެފައިވެއެވެ. އަދި މި ހާދިސާތަކުގައި މިހާތަނަށް ހާހަކަށްވުރެ ގިނަ މީހުން ހާލުގައިޖެހިފައި ވެއެވެ.
