މަޝްހޫރު ކާރު ބްރޭންޑެއް ކަމަށްވާ މާސިޑީޒް-ބެންޒްގެ ބައެއް އުފެއްދުންތަކުގައި ސަލާމަތީ ގޮތުން އެކަށީގެން ނުވާ ކަންތައްތަކެއް ހުރުމުން، އެ އުފެއްދުންތައް އަނބުރާ ހަވާލު ކުރުމަށް އެކުންފުނިން ގޮވާލައިފިއެވެ.
މާސިޑީޒް ކުންފުނިން އަނބުރާ ހަވާލު ކުރުމަށް ގޮވާލާފައިވަނީ 2001 ވަނަ އަހަރާއި 2011 ވަނަ އަހަރާ ދެމެދު އެ ކުންފުނިން ވިއްކާފައިވާ ބައެއް މޮޑެލްތަކުގެ ކާރުތަކުގެ ސަން-ރޫފް، ކާރުން ވަކިވެ، ވިއްސައިގެންދާ މައްސަލައަކާ ގުޅިގެންނެވެ.
މި ގިންތިއަށް ފެތޭ 75000 އަށް ވުރެ ގިނަ ކާރު އެކުންފުނިން ވަނީ ވިއްކާފައެވެ. އަދި ކާރުތަކުގެ އޯނަރުންނާ އެކުންފުނިން ގުޅަން ފަށާނީ ފެބުރުވަރީ މަހުގެ 4 ވަނަ ދުވަހު ނުވަތަ އޭގެ ފަހުން ކަމަށް ހަބަރު ލިބެއެވެ.
ހަތަރު މޮޑެލްއެއްގެ ކާރުތަކުގެ ސަން-ރޫފް، ކާރުން ވަކިވެ، ވިއްސައިގެން ދަނީ އެ ބައި ހަރުކުރުމަށް ބޭނުންކޮށްފައިވާ ބޮންޑިންގް އޭޖެންޓްގައި މައްސަލަތަކެއް ހުރުމުގެ ސަބަބުން ކަމަށް މައުލޫމާތު ލިބެއެވެ.
މާސިޑީޒް ކުންފުނިން ވަނީ މައްސަލަ އުޅޭ ގިންތީގައި ހިމެނޭ ކާރުތައް އިންސްޕެކްޓް ކުރުމަށްފަހު، ބަދަލެއް ގެންނަން ޖެހޭނަމަ އެއްވެސް އަގަކާ ނުލާ އެ ކަންތައްތައް ކޮށްދޭނެ ކަމަށް ބުނެފައެވެ.
