ނިމިގެން ދިޔަ 2019 ވަނަ އަހަރަކީ، މުޅި ރާއްޖޭގައި ސުލްހަވެރިކަން ގާއިމުކުރެވުނު އަހަރެއްކަން ފާހަގަކުރައްވާފައިވެއެވެ.
ރައީސް ސޯލިހް މިހެން ވިދާޅުވީ މީލާދީ އާ އަހަރު ފެށުމުގެ މުނާސަބަތުގައި، ރާއްޖޭގެ ރައްޔިތުންނަށް ފޮނުއްވި ތަހުނިޔާގެ ހިތާބުގައެވެ. ނިމިގެން ދިޔަ 2019 ވަނަ އަހަރު، މުޅި ރާއްޖޭގައި ސުލްހަވެރިކަން ގާއިމުކުރެވުނު އަހަރެއްކަން ފާހަގަކުރައްވާ އެމަނިކުފާނު ވިދާޅުވީ، ސިޔާސީ ދެބަސްވުންތަކާއި އަރައިރުންތަކުން ދުރަށް ޖެހި، އާއިލީ އަދި އިޖްތިމާއީ ގުޅުންތަކުން، މުޖްތަމައުގައި އުފާވެރިކަން ފަތުރައިލަދިން އަހަރެއްކަން އެމަނިކުފާނު ފާހަގަކުރެއްވިއެވެ.
މީގެ އިތުރުން ބައިނަލްއަގްވާމީ މުޖްތަމައުގެ އިޙްތިރާމާއި ގަދަރު ރާއްޖެއަށް ލިބުނު އަހަރެއްގެ އިތުރުން އިގްތިސޯދީ ގޮތުންވެސް ރާއްޖެ ކަޑައްތުކުރީ، ފާގަތި އަދި ފުދުންތެރި ދުވަސްތަކެއްކަން އެމަނިކުފާނުގެ ހިތާބުގައި ފާހަގަކުރައްވާފައިވެއެވެ.
ރައީސް ސޯލިހްގެ ހިތާބުގައި ވިދާޅުވީ، ރައްޔިތުން އުފެއްދި މި ސަރުކާރު ދެމިއޮންނާނީ، ފުދުންތެރި އަދި ބާއްޖަވެރި ދިރިއުޅުމަކަށް ރައްޔިތުން ކުރާ އުންމީދުތައް، ހަގީގަތަކަށް ހަދައިދިނުމުގައި ކަމަށެވެ. އަދި ރައްޔިތުންގެ އިންސާނީ ހައްގުތައް ހިމާޔަތްކޮށްދީ، ގާނޫނުއަސާސީން ކަށަވަރުކޮށްދީފައިވާ އަސާސީ ހައްގުތައް، ހަމަހަމަކަމާއި އަދުލުވެރިކަމާ އެކު ރައްޔިތުންނަށް ފޯރުކޮށްދިނުމަށްކަން އެމަނިކުފާނު ފާހަގަ ކުރެއްވިއެވެ.
އާ އަހަރަކާ ކުރިމަތިލާއިރު ލާމަރުކަޒީ ގާނޫނު ގެނައި 8 ވަނަ އިސްލާހާއެކު އެ ގާނޫނަށް އަމަލުކުރަން ފެށުމުން، ފުރިހަމަ މާނައިގައި ރާއްޖެ ލާމަރުކަޒީވެގެން ދާނެކަން ރައީސް ސޯލިހް ފާހަގަކުރެއްވިއެވެ. އަދި މިއާއެކު ޖަޒީރާވަންތަ ރާއްޖެއެއްގެ ގޮތުގައި، ރާއްޖެ ތަރައްގީ ކޮށްދިނުމަށް ރައްޔިތުން އެދުނު އެދުމާ އެއްގޮތަށް، އެކަން ކުރުމުގެ ފުރިހަމަ އިހްތިޔާރާއި ބާރު، ރައްޔިތުންގެ އަތްމައްޗަށް ދީ، މާލީ ގޮތުންނާއި އިދާރީ ގޮތުން، ކައުންސިލްތަކަށް މިހާރު ފުރިހަމަ މިނިވަންކަން ދެވިފައިވާކަމަށް ވެސް އެމަނިކުފާނު ވިދާޅުވިއެވެ. އަދި މިފެށުނު އަހަރުގައިވެސް ދައުލަތުގެ ކޮންމެ މުއައްސަސާއަކުން، އަދި ދައުލަތުގެ މަގާމެއްގައި ހުރި ކޮންމެ މީހަކުމެ، މަސައްކަތް ކުރަންވީ، ރައްޔިތުންގެ މަސްލަހަތު އިސްކޮށް، ގާނޫނުގެ ވެރިކަން ދަމަހައްޓައި، ސުލްހަޔާއި އަމާންކަމުގެ މާހައުލެއްގައި، ތަރައްގީގެ މުޅިން އައު މަރުހަލާއަކަށް ރާއްޖެ ގެންގޮސް ދިނުމަށްކަމުގައި ރައީސް ސޯލިހް ވިދާޅުވިއެވެ.
ރައީސް ސޯލިހްގެ ހިތާބު ނިންމަވާލައްވާފައި ވަނީ މިފެށުނު 2020 ވަނަ އަހަރަކީ، ރާއްޖެއާއި ރާއްޖޭގެ ރައްޔިތުންނަށް ބާއްޖަވެރި، އަދި ގައުމީ ތަރައްގީގެ ރާސްތާގައި، މަތިވެރި ކާމިޔާބީތަކެއް ހާސިލު ކުރެވޭނެ އަހަރެއްކަމުގައި ލެއްވުން އެދި ދުއާ ދަންނަވަމުންނެވެ.
މުސްލިމުންގެ އެންމެ ބޮޑު މަޞްލަޙަތު ކަމުގައިވާ އިސްލާމް ދީނަށް ފުރައްސާރަކޮށް ހަޖޫ ޖަހާ،، އެންމެ ބޮޑަށް އިސްލާމް ދީނާއި އަދާވާތްތެރިކަން ފާޅު ކޮށްފައިވާ އަހަރަކީ 2019. އަދި މިނުބައި ފާޙިޝްކަންތައް ދިފާޢު ކުރުމުގައި ސަރުކާރުގެ ބައިވެރިވުން އޮތް ކަމީ ރައްޔިތުންގެ ކަންބޮޑުވުން އިންތިހާއަށް ބޮޑުވެފައިވާ ކަމެއް! ސަރުކާރު ލަދުގަންނަން ޖެހޭ!