ސުޕްރީމް ކޯޓުން ހުސްވެފައިވާ ފަނޑިޔާރުންގެ މަގާމަށް އައްޔަން ކުރުމަށް އިލްމުވެރިންގެ ގުޅުމަށް ފެންނަ ނަންތަކެއް ރައީސް އިބްރާހީމް މުހައްމަދު ސޯލިހަށް އެ ޖަމިއްޔާއިން ހުށަހަޅައިފިއެވެ.
އިލްމުވެރިންގެ ގުޅުމުން ރައީސް އިބްރާހީމް މުހައްމަދު ސޯލިހަށް ފޮނުވާފައިވާ ސިޓީއެއްގައި ވަނީ އެ ޖަމިއްޔާއަށް ފެންނަ ފަނޑިޔާރުންގެ ނަންތަކެއް ހިމަނާފައެވެ. އަދި އެ ފަނޑިޔާރުންނަކީ މިހާރުވެސް ރާއްޖޭގެ ބައެއް ކޯޓުތަކުގައި މަސައްކަތް ކުރައްވާ ފަނޑިޔާރުންނެވެ. އެ ޖަމިއްޔާއިން ރައީސަށް ފޮނުވާފައި ސިޓީގައި ބުނެފައިވަނީ އެ ޖަމިއްޔާއިން ކަނޑައަޅާފައިވާ ފަނޑިޔާރުންނަކީ މުސްތަގުބަލުގައި އެއްވެސް ހާލެއްގައި ގޯސް މަގަކުން ނުހިނގާނެ ފަރާތްތަކެއް ކަމަށް ކަށަވަރުކަމާ އެކީގައި ނުދަންނަވާ ކަމަށެވެ. އެބޭފުޅުންގެ ނަންތައް ރައީސަށް އަރުވާފައިވަނީ މިހާތަނަށް އެފަރާތްތަކުން ކުރައްވާފައިވާ މަސައްކަތްތަކާއި އެބޭފުޅުންގެ ބޭރުފުށުގެ އަހުލާގާއި މުއާމަލާތްތަކަށް ބެލުމަށްފަހު ކަމަށް އިލްމުވެރިންގެ ގުޅުމުން ރައީސަށް ފޮނުވާފައިވާ ސިޓީގައިވެއެވެ.
އިލްމުވެރިން ގުޅުމުން ފޮނުވާފައިވާ ސިޓީގައި ބުނެފައި ވަނީ މުސްލިމުންގެ ވެރިންގެ ފަރާތުން، މުސްލިމުންގެ މެދުގައާއި، އެމީހުންނާ އެކު ދިރިއުޅޭ އެންމެހާ ފަރާތްތަކުގެ މެދުގައި އަދުލުވެރިކަން ގާއިމުކޮށް ރައްކާތެރި ކޮށްދިނުމަށް އައްޔަނުކުރެވޭ ފަނޑިޔާރުންގެ ކިބާގައި ހުންނަންޖެހޭނެ ޝަރުތުތަކާއި އެމީހުންގެ ގާބިލުކަމާ ގުޅޭގޮތުން އިސްލާމީ އުންމަތުގެ އިލްމުވެރިން ވަނީ ބޮޑެތި ދިރާސާތައް ކުރައްވާފައިވާ ކަމަށެވެ. އެގޮތުން ޝަރުއީ ދަލީލުތަކުން އެކަންކަމަށް ހެކިދޭ އުސޫލުތަކާއި ހަމަތައް އެކިސިފަސިފާގައި އިލްމުވެރިން ފޯރުކޮށްދެއްވާފައިވާ ކަމަށެވެ.
އެގޮތުން ހުލާސާ ގޮތެއްގައި ބަލާއިރު އިސްލާމީ ވެރިކަމެއްގެ ތެރޭގައި މުސްލިމުންގެ މެދުގައި ނިޔާ ކަނޑައެޅުމަށް ތިއްބަވާ ފަނޑިޔާރުންގެ ކިބައިގައި ފުރިހަމަވާންޖެހޭ ޝަރުތުތަކެއް ބަޔާންކޮށްފައިވާ ކަމަށް އިލްމުވެރިންގެ ގުޅުމުން ރައީސަށް ފޮނުވާފައިވާ ސިޓީގައިވެއެވެ. އޭގެ ތެރޭގައި މުސްލިމަކަށް ވުމާއި، ފުރާފުރިހަމަ ވެފައިވެފައިވާ ބުއްދިސަލާމަތުން ހުރި މިނިވަން މީހަކަށްވުމާއި، ހިއްސުތައް ސަލާމަތުން ހުރިމީހަކަށްވުމާއި، ފިރިހެނުންނަށްވުމާއި، އަދުލުވެރިންނަށްވުމާއި، އިޖުތިހާދު ކުރެވޭ ވަރުގެ މީހުންނަށްވުން ހިމެނޭ ކަމަށްވެސް އެ ސިޓީގައިވެއެވެ.
"އިޖްތިހާދުކުރެވޭ ފަދަ މީހަކަށްވުމަށް ބަލާއިރު، އެފަދަ މީހަކަށްވުމަށްޓަކައި ކީރިތި ގުރްއާނާއި ނަބަވީސުންނަތުގެ އިލްމް އުނގެނިފައިވުމާއި، އުންމަތުގެ އިލްމުވެރިން އެކަންކަމާމެދު އިޖުމާއުވެވަޑައިގެންފައިވާ މައްސަލަތަކާއި، ގިޔާސް ކުރުމާއި ގުޅޭ ހުކުމްތައް ރަނގަޅަށް އެނގޭ ފެންވަރުގެ މީހަކަށްވުމާއި، ކަންކަމާމެދު ސަހާބީންގެ ބަސްފުޅުތައް އެނގޭ މީހަކަށްވުމާއި، އެހުރިހާކަމެއްގެ އަސްލުތައް އައިސްފައިވާ ބަސްކަމަށްވާ އަރަބިބަސް ވަރަށް ރަނގަޅަށް ދަންނަ މީހަކަށްވުން ފަދަ ކަންކަމަކީ އިޖްތިހާދު ކުރެވޭފަދަމީހަކަށް ވުމުގައި އިލްމުވެރިން ޝަރުތު ކުރައްވާ ކަންކަމެވެ،" އެ ސިޓީގައިވެއެވެ.
ޝަރުއީ ހަމަތަކުން ބަލާއިރު، ފަނޑިޔާރުންނަކީ، ވަލިއްޔުލްއަމްރުގެ އިސްތަށިފުޅުގައި އެޅިފައި އޮންނަ އަދުލުއިންސާފު ގާއިމް ކޮށްދީ ނިޔާ ކަނޑައެޅުމުގެ ޒިންމާ ވަލިއްޔުލްއަމްރުގެ ފަރާތުން ގާއިމް ކޮށްދިނުމަށް ހަވާލުކުރެވޭ ފަރާތްތަކެއް ކަމަށް އިލްމުވެރިންގެ ގުޅުމުން ރައީސް ސޯލިހަށް ފޮނުވާފައިވާ ސިޓީގައިވެއެވެ. އަދި ދިވެހިރާއްޖޭގެ ގާނޫނީ ނިޒާމުގައިވެސް އެ އުސޫލު ގާއިމު ކޮށްދީފައިވަނީ އިސްލާމް ދީނުގައިވާ އެފަދަ އަމަލުތައް ހިފެހެއްޓޭ ގޮތަށް އެ އެސޫލުން ކަމަށްވެސް އެ ސިޓީގައިވެއެވެ.
އިސްލާމްދީނުގެ އުސޫލުތައް ގާއިމްކުރެއްވުމުގައި ރައީސް ސޯލިހު ދެމި ހުންނެވިހާ ހިނދަކު އިލްމުވެރިންގެ ގުޅުމުގެ ހުރިހާ އިލްމުވެރިންވެސް ރައީސް ސޯލިހާއި އެކުގައި ދެމި ހުންނަވާނެ ކަމަށް އެ ސިޓީގައި ބަޔާން ކުރައްވާފައިވެއެވެ.
އިލްމުވެރިންގެ ގުޅުމުން މިފަދައިން އިލްތިމާސް ކޮށްފައި މިވަނީ ސުޕްރީމް ކޯޓުގެ ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީއާ ފަނޑިޔާރު އާދަމް މުހައްމަދު އަބްދުﷲ މަގާމުން ވަކި ކުރުމަށް ރައްޔިތުންގެ މަޖިލީހުން ދާދިފަހުން ނިންމާފައިވުމުން ހުސްވެފައިވާ އެ ކޯޓުގެ ފަނޑިޔާރު ކަމަށް ކުރިމަތިލުމަށް ސަރުކާރުން ހުޅުވާލާފައި ވަނިކޮށެވެ.
