ސްޕްރީމް ކޯޓުގެ ފަޑިޔާރު ކަމަށް އައިޝާ ޝުޖޫން އާއި ޑރ. އަޒުމިރަލްޑާ ޒާހިރު އައްޔަން ކުރަން މަޖިލީހުން ފާސްކޮށްފިއެވެ. މިހާރު ކުރިއަށް ދާ މަޖިލީހުގެ ޖަލްސާގައި މި ދެބޭފުޅުން އައްޔަން ކުރަން ފާސް ކުރީ 62 ވޯޓުންނެވެ. 1 މެންބަރަކު ނުފެންނަކަމަށް ވޯޓު ދިން އިރު ވަކި ގޮތަކަށް ވޯޓު ނުދޭ 1 މެންބަރަކު އިންނެވިއެވެ.
ސްޕްރީމް ކޯޓަށް އައްޔަން ކުރަން ޝުޖޫން އާއި ޑރ. އަޒުމިރަލްޑާގެ އިތުރުން ރައީސް އިބްރާހިމް މުހައްމަދު ސޯލިހު 3 ނަމެއް މަޖިލީހަށް ފޮނުއްވިއެވެ. އެއީ ދަފްތަރު ނަންބަރު 6993 ޝުއައިބް ޙުސައިން ޒަކަރިއްޔާ، ހދ.ވައިކަރަދޫ ގްރީންވިލާ، މުޙައްމަދު ނިޔާޒުގެ އިތުރުން މއ. ވޭސައިޑް 610 ޢަލީ ސަމީރުގެ ނަމެވެ. ނަމަވެސް މަޖިލީހުގެ ކަމާ ގުޅޭ ކޮމެޓީން ބެލުމަށް ފަހު ނިންމީ ޝުޖޫންއާއި ޑރ.އަޒުމިރަލްޑާ އައްޔަން ކުރުން ރަނގަޅު ކަމަށެެވެ.
ރާއްޖޭގެ އެންމެ މަތީ ކޯޓަށް އަންހެން ފަޑިޔާރުން އައްޔަން ކުރުމާ ދެކޮޅަށް އެކިއެކި ފަރާތްތަކުން އަޑު އުފުލާފައި ވެއެވެ. އޭގެ ތެރޭގައި ދީނީ އިލްމުވެރިންވެސް ހިމެނެއެވެ. ހަމަ އެއާއެކު ބައެއް ދީނީ އިލްމުވެރިން ވަނީ އަންހެނުން ސްޕްރީމް ކޯޓަށް އައްޔަން ކުރެވޭނެ ކަމަށް ބުނެ ވަކާލާތު ކޮށްފައެވެ.
ސްޕްރީމް ކޯޓުގެ ބެންޗަށް އެކި ވެރިކަމުގައި ބަދަލުތައް ގެނެސްފައި ވެއެވެ. އެގޮތުން 5 މެންބަރުންނާއި 7 މެންބަރުން ހިމަނާފައިވެއެވެ. އެންމެ ފަހުން ބެންޗަށް ބަދަލު ގެނައީ މިހާރު ހިނގަމުންދާ 19 ވަނަ މަޖިލީހުގައެވެ.
ސްޕްރީމު ކޯޓުގެ ފަނޑިޔާރުންގެ އަދަދު 5 އިން 7 އަށް ބަދަލު ކުރުމަށް ދިވެހިރާއްޖޭގެ ކޯޓުތަކުގެ ޤާނޫނަށް ރައްޔިތުންގެ މަޖިލީހުން ގެނައި އިސްލާހު ރައީސުލްޖުމްހޫރިއްޔާ ތަސްދީޤު ކުރައްވާފައި ވަނީ މިދިޔަ ޖުލައިމަހުގެ 23 ވަނަ ދުވަހުއެވެ.
ޝުޖޫންއާއި ޑރ. އަޒުމިރަލްޑާ އައްޔަން ކުރަން ފާސް ކުރީ، ސްޕްރީމް ކޯޓުގެ ބެންޗް 7 އަށް ބަދަލު ކުރުމާއެކު މަދުވާ 2 ޖާގަ އަށެވެ. ސްޕްރީމް ކޯޓުގެ ބެންޗުގައި އެންމެ ފަހުން ތިއްބެވި ބޭފުޅުންގެ ތެރެއިން ފަނޑިޔާރު އަބްދުﷲ ދީދީ މަގާމުން ވަކި ކުރުމާ ގުޅިގެން ހުސްވެފައިވާ މަގާމަށް ކުރިމަތިލާން ބޭނުން ފަރާތްތަކަށް ހުޅުވާލި ފުރުޝަތުގައި ދެބޭފުޅަކު މިހާރު ކުރިމަތި ލައްވާފައިވެއެވެ.
