24 ގަޑި އިރު ވިޔަފާރި ކުރުމުގެ ހުއްދަ މިނިސްޓްރީ އޮފް އިކޮނޮމިކް ޑިވެލޮޕްމަންޓުން ހުޅުވާލައިފިއެވެ.
އިކޮނޮމިކް މިނިސްޓްރީން ބުނީ، 24 ގަޑިއިރު ވިޔަފާރި ކުރުމުގެ ހުއްދަ ހުޅުމާލެއިން ދިނުމަށް ހަމަޖެހިފައިވަނީ ތިން ސަރަހައްދަކުން ކަމަށާއި އެ ސަރަހައްދުތަކަކީ ނިރޮޅު މަގާއި، ހުވަނދުމާ ހިނގުމުގެ އިތުރުން ފެރީ ޓަމިނަލް ސަރަހައްދުންނެވެ.
ސައުވީސް ގަޑިއިރު ވިޔަފާރި ކުރަން ހުޅުމާލޭގައި ހުއްދަ ދޫކުރަނީ، އިމްޕޯޓް މުދަލުގެ ވިޔަފާރިކުރާ ތަންތަނުގެ ތެރެއިން ހަމައެކަނި ޒަރޫރީ ކަންކަމަށް ބޭނުން ކުރާ ތަކެތި ވިއްކާ ތަންތަނަށް ކަމަށް އެ މިނިސްޓްރީން ބުނެއެވެ. އަދި ވިޔަފާރި ކުރުމުގެ ހުއްދަ ދޫކުރާނީ ހުއްދައަށް އެދޭ ތަނުގައި ފުރިހަމަވާންޖެހޭ ކަންކަން ފުރިހަމަތޯ ބަލައި ފާސް ކުރުމަށްފަހުގައި ކަމަށް ވެސް އެ މިނިސްޓްރީން ބުނެއެވެ. އެގޮތުން 24 ގަޑިއިރު ވިޔަފާރި ކުރުމަށް ހުއްދަ ދޫކުރެވޭ ތަންތަން ބަންދު ކުރެވޭނީ ހަމައެކަނި ނަމާދު ވަގުތުތަކަށް ކަމަށާއި އެހެނިހެން ވަގުތު ތަކުގައި ވިޔަފާރި ކުރަން އަންނަ ފަރާތްތަކަށް ވިޔަފާރީގެ ހިދުމަތްތައް ލިބެން ޖެހޭނެ ކަމަށްވެސް އެމިނިސްޓްރީން ބުނެއެވެ.
ހުޅުމާލޭގައި މިފަދައިން ވިޔަފާރި ކުރުމަށް ހުއްދައަށް އެދެން ބޭނުންވާ ވިޔަފާރިވެރިން އެކަމަށް ހުއްދައަށް އެދޭ ފޯމު ފުރިހަމަ ކުރުމަށްފަހު ހުށައެޅުމަށާއި އެ ފޯމު މިނިސްޓްރީގެ ވެބްސައިޓުން ލިބެން ހުންނާނެ ކަމަށް އިކޮނޮމިކް މިނިސްޓްރީން ބުނެއެވެ.
