ރަސްމީ ދަތުރުފުޅެއްގައި ލަންކާގެ ބޮޑުވަޒީރު ރަނިލް ވިކްރަމަސިންހަ ރާއްޖެ ވަޑައިގަންނަވަން ހަމަޖެހިއްޖެ އެވެ.
ރައީސް އޮފީހުން މައުލޫމާތު ދޭގޮތުގައި، ލަންކާގެ ބޮޑުވަޒީރު އަންނަ މަހުގެ ދެވަނަ ދުވަހު ރާއްޖެއަށް ވަޑައިގަންނަވާ ގޮތަށް ވަނީ ހަމަޖެހިފަ އެވެ. ސްރީލަންކާގެ ބޮޑުވަޒީރުގެ މި ދަތުރުފުޅަކީ ރައީސް ސޯލިހްގެ ދައުވަތަކަށް ކުރައްވާ ދަތުރުފުޅެކެވެ. ލަންކާގެ ބޮޑުވަޒީރުގެ މިދަތުރުފުޅުގައި އަނބިކަބަލުން ޕްރޮފެސާ މައިތިރީ ވިކްރަމަސިންހަ އާއި އެ ގައުމުގެ މަތީފެންވަރުގެ ވަފުދެއް ބައިވެރިވެ ވަޑައިގަންނަވައެވެ.
ސްރީލަންކާގެ ބޮޑުވަޒީރުގެ މި ދަތުރުފުޅުގައި ރައީސް ސޯލިހާއި ބައްދަލުކުރައްވައި ދެ ގައުމުގެ ދެމެދުގައި އެކި ދާއިރާތަކުން އިތުރަށް ގުޅުން ބަދަހި ކުރުމާ ބެހޭގޮތުން މަޝްވަރާ ކުރައްވާނެއެވެ.
ބޮޑުވަޒީރުގެ މިދަތުރުފުގައި، ރާއްޖޭގައި އަންނަ ސެޕްޓެންބަރު މަހުގެ 3 އިން 4 އަށް ބާއްވާ އިންޑިއަން އޯޝަން ކޮންފަރެންސް 2019 ގައި ބައިވެރިވެވަޑައިގެން އެ ކޮންފަރެންސް ޗެއާ ކުރައްވާގޮތަށް ވެސް ވަނީ ހަމަޖެހިފައެވެ.
