ރައްޔިތުންގެ މަޖިލީހުގެ ކޮމިޓީތަކަށް މީހުން ހާޒިރުކުރުމުގެ ފަސް ދުވަހުގެ ކުރިން ނޯޓިސް އަކުން އެމީހަކަށް އަންގާ ގޮތަށް ރައްޔިތުންގެ މަޖިލީހުން ނިންމައިފިއެވެ.
މަޖިލީހުގެ އިދާރާގައި މިއަދު ބޭއްވި ނޫސްވެރިންގެ ބައްދަލުވުމުގައި މަޖިލީހުގެ އަމީންއާންމު ފާތިމަތު ނިއުޝާ ވިދާޅުވީ މަޖިލީހުގެ ކޮމިޓީގެ މުގައްރިރުންނާ ބައްދަލު ކުރެއްވުމަށް ފަހު މަޖިލީހުގެ ރައީސް، ރައީސް މުހައްމަދު ނަޝީދު ނިންމަވާފައި ވަނީ ކޮމިޓީތަަކަށް ހާޒިރުކުރެވޭ ފަރާތްތަކަށް 5 ދުވަހުގެ ނޯޓިސްއެއް ދިނުމަށްފަހު މެނުވީ ހާޒިރު ނުކުރައްވަން ކަމަށެވެ. އަދި އެބެފުޅުންނަށް ތައްޔާރުވުމަށް 5 ދުވަހުގެ މުހުލަތެއް މީގެ ފަހުން އެރުވޭނެ ކަމަށް ނިއުޝާ ވިދާޅުވިއެވެ.
އަމީންއާންމު ވިދާޅުވީ އަންނަ ހަފްތާގައި އެކިއެކި ކޮމިޓީތަކަށް ސަރުކާރުގެ އެކިއެކި އިދާރާތަކުގައި ހިމެނޭ ބައެއް ފަރާތްތައް ހާޒިރުކުރުމަށް ނިންމާފައިިވާ ކަމަށެވެ.
އެގޮތުން އިޖްތިމާއީ ކޮމިޓީއަށް އަންނަ ހަފްތާގެ ހޯމަ ދުވަހު ޔޫތް މިނިސްޓްރީގެ ބޭފުޅުން ހާޒިރުކުރައްވާ އިރު، އަންގާރަ ދުވަހު އެންސްޕާގެ ބޭފުޅުންނަ އެ ކޮމިޓީން ބައްދަލުކުރައްވާނެ ކަމަށެވެ. މީގެ އިތުރުން މިނިވަން މުއައްސަސާތަކުގެ ކޮމިޓީން އަންގާރަ ދުވަހު އިލެކްޝަންސް ކޮމިޝަންގެ ބޭފުޅުންނާއި ބައްދަލުކުރުމަށް ހަމަޖެހިފައިވާ އިރު ބުދަ ދުވަހު މޯލްޑިވްސް މީޑިއާ ކައުންސިލްގެ ބޭފުޅުންނާ ބައްދަލުކުރުމަށް ހަމަޖެހިފައިވާކަމަށް ނިއުޝާ ވިދާޅުވިއެވެ.
ސަރުކާރު މަސްއޫލިއްޔާތު ކޮމިޓީން އަންގާރަ ދުވަހު ހައުސިން މިނިސްޓްރީގެ ބޭފުޅުންނާއި ބައްދަލުކުރައްވުމަށް ޖަމަހެިފައިވާ އިރު، ޖުޑިޝަރީ ކޮމިޓީން އަންގާރަ ދުވަހު އެޓާނީ ޖެނެރަލް އޮފީހުގެ ބޭފުޅުންނާ ބައްދަލުކުރެއްވުމަށް ހަމަޖެހިފައިވާކަމަށް ނިއުޝާ ވިދާޅުވިއެވެ.
އަދި މަޖިލީހުގެ އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީން ކުނީގެ މައްސަލައާއި ގުޅިގެން ކަމާގުޅުން ހުރި އިދާރާތަކާއި، ހާއްސަކޮށް ވެމްކޯ، އީޕީއޭ، އެލްޖީއޭ އަދި އެނަވަޔަރަމަންޓް މިނިސްޓްރީގެ ބޭފުޅުންނާ ބައްދަލުކުރެއްވުމަށް ހަމަޖެހިފައިިވާ ކަމަށް ވެސް ނިއުޝާ ވިދާޅުވިއެވެ.
މީގެ އިތުރުން ހިއުމަން ރައިޓްސް އެންޑް ޖެންޑާ ކޮމިޓީން އަންނަ ހޯމަދުވަހު ތައާރަފްވުމުގެ ގޮތުން އެޗްއާރުސީއެމްގެ މެންބަރުންނާ ބައްދަލުކުރެއްވުމަށް ހަމެޖިހިފައިވާ އިރު ބުދަ ދުވަހު ޖެންޑާ މިނިސްޓްރީއާ ބައްދަލުކުރާނެކަމަށް ނިއުޝާ ވިދާޅުވިއެވެ. އަދި އެސްއޯއީ ކޮމިޓީން އަންނަ ހޯމަ ދުވަހު ސަރުކާރު ހިއްސާވާ ކުންފުނިތަކާއި ވިޔަފާރި އިދާރާތަކުގެ މަސައްކަތް ދިރާސަ ކުރެއްވުމުގެ ގޮތުން އާސަންދަ ކުންފުނީގެ ބޭފުޅުންނާ ބައްދަލުކުރެއްވުމަށް ހަމަޖެހިފައިވާ ކަމަށް ވެސް ނިއުޝާ ވިދާޅުވިއެވެ.
