ކްރިމިނަލް ކޯޓުގައި މިހާތަނަށް ނުނިމި 1910 މައްސަލައެއް އޮތް ކަމަށް ޖުޑީޝަލް ސާވިސް ކޮމިޝަން (ޖޭއެސްސީއިން) ރައްޔިތުންގެ މަޖިލީހަށް މިއަދު ހިއްސާކުރި ރިޕޯޓުން ހާމަވެއްޖެއެވެ.
މި ރިޕޯޓު މަޖިލީހަށް ޖޭއެސްސީގެ ފަރާތުން ހިއްސާ ކުރުމުން މަޖިލީހުގެ ރިޔާސަތުގައި އިންނަވާ މަޖިލީހުގެ ރައީސް، ރައީސް މުހައްމަދު ނަޝީދު ވަނީ މަޖިލީހާ ހިއްސާ ކުރައްވާފައެވެ. ޖޭއެސްސީއިން އާންމު ކޮށްފައިވާ ރިޕޯޓުގައި ބުނެފައި ވަނީ ކްރިމިނަލް ކޯޓުގައި ޖުމްލަ 9 ފަނޑިޔާރަކު މަސައްކަތް ކުރަމުން ދާއިރު ވެސް މިހާތަނަށް 1910 މައްސަލައެއް އެ ކޯޓުގައި ނުނިމި އޮތް ކަމަށެވެ.
މި ރިޕޯޓުގައި ބުނެފައި ވަނީ 376 މައްސަލައާ އެކު މިހާތަނަށް އެންމެ ގިނަ މައްސަލަ ނުނިމި އޮތީ ގާޒީ އަލީ އާދަމް ބަލަމުންދާ މައްސަލަތަކެއް ކަމަށެވެ. ދެވަނައަށް އެންމެ ގިނަ މައްސަލަ މިހާތަނަށް ނުނިމި އޮތީ ގަޒީ އަލީ ރަޝީދާއި، އިބްރާހީމް އަލީގެއެވެ. މި ދެ ގަޒީންގެ މައްޗަށް ވަކިވަކިން 280 މައްސަލައެއް މިހާތަނަށް ނުނިމި އޮތް ކަމަށް ރިޕޯޓުން ހާމަވެ އެވެ. ގާޒީ އަހްމަދު ޝަކީލަށް މިހާތަނަށް 187 މައްސަލަ ނުނިމި އޮތް އިރު، ގާޒީ އިސްމާއީލް ރަޝީދަށް މިހާތަނަށް ނުނިމި އޮތީ 173 މައްސަލަ އެވެ. އަދި ގާޒީ ހުސެއިން ފާއިޒް ރަޝީދަށް މިހާތަނަށް 165 މައްސަލަ ނުނިމި އޮތް އިރު، ގާޒީ ހަސަން ނަޖީބަށް މިހާތަނަށް ނުނިމި އޮތީ 157 މައްސަލައެވެ. 151 މައްސަލައާއެކު ދެން އެންމެ ގިނަ މައްސަލަ ނުނިމި އޮތީ ގަޒީ މުހައްމަދު ސަމީރަށެވެ. ކްރިމިނަލް ކޯޓުގެ 9 ފަނޑިޔާރުންގެ ތެރެއިން މަދު މައްސަލައެއް ކްރިމިނަލް ކޯޓުން ބަލަމުންދަނީ ގަޒީ ހަސަން ނަޖީބެވެ. ހަސަން ނަޖީބަށް މިހާތަނަށް 141 މައްސަލަ ނުނިމި އޮތް ކަމަށް ޖޭއެސްސީގެ ރިޕޯޓުން ހާމަވެއެވެ.
ކްރިމިނަލް ކޯޓުގައި ނުނިމި ހުރި މައްސަލަތަކުގެ ތެރެއިން 10 އަހަރު ދުވަހަށް ވުރެން ގިނަ ދުވަސްވެފައިވާ ޖުމްލަ 12 މައްސަލައެއް ހިމެނެއެވެ. މީގެތެރެއިން 11 މައްސަލައެއް މިހާރު ބަލަމުންދަނީ ގާޒީ އަލީ ރަޝީދު ކަމަށް ރިޕޯޓުގައި ބުނެފައި ވެއެވެ. އަދި އޭގެތެރެއިން އެއް މައްސަލަ ބަލަމުންދަނީ ގާޒީ އަހުމަދު ޝަކީލެވެ.
މީގެއިތުރުން ކްރިމިނަލް ކޯޓުގައި ހުރި މައްސަލަތަކުގެ ތެރެއިން 5 އަހަރު ދުވަހަށް ވުރެން ގިނަ ދުވަސް ވެފައިވާ، 126 މައްސަލައެއް ހިމެނެއެވެ. އޭގެތެރެއިން 77 މައްސަލައެއް ގާޒީ އަލީ ރަޝީދު ބަލަމުން ދާއިރު، 12 މައްސަލައެއް ގާޒީ ހުސެއިން ފާއިޒް ރަސީދު ދަނީ ބަލަމުން ނެވެ. އަދި 11 މައްސަލައެއް ގާޒީ އަހުމަދު ޝަކީލު ބަލަމުން ދާއިރު، 10 މައްސަލައެއް ގާޒީ އަހްމަދު ހައިލަމް ދަނީ ބަލަމުންނެވެ. 6 މައްސަލައެއް ގާޒީ އިސްމާއީލް ރަޝީދު ބަލަމުން ދާއިރު، 4 މައްސަލައެއް ގާޒީ ހަސަން ނަޖީބު އަދި އަލީ އާދަމް ދަނީ ބަލަމުންނެވެ. 2 މައްސަލައާއެކު އެންމެ މަދުން މައްސަލަ ބަލަމުން ދަނީ ގާޒީ މުހައްމަދު ސަމީރެވެ. އަދި މީގެތެރެއިން އެއްވެސް މައްސަލައެއް ބަލަމުން ނުދަނީ ގާޒީ އިބްރާހީމް އަލީ އެވެ.
ކްރިމިނަލް ކޯޓުގައި ހުރި މައްސަލަތަކުގެ ތެރެއިން 3 އަހަރު ދުވަހަށް ވުރެން ގިނަ ދުވަސް ވެފައިވާ 181 މައްސަލައެއް ހިމެނޭކަމަށް ރިޕޯޓުން ހާމަވެގެން ދެއެވެ، ޖިނާއީ އިޖުރާއަތު ގާނޫނަށް އަމަލު ކުރަން ފެށި ފަހުން 1153 މައްސަލައެއް ކްރިމިނަލް ކޯޓަށް ވަނީ ހުށަހަޅާފަ އެވެ. 2019 ވަނަ އަހަރު ކްރިމިނަލް ކޯޓަށް ހުށަހެޅިފައިވާ މައްސަލަތަކުގެ ތެރެއިން 250 މައްސަލައެއް ފަނޑިޔާރުންގެ މެދުގައި ބަހާފައި ވާކަމަށް ވެސް ރިޕޯޓުން ބުނެއެވެ.
ކްރިމިނަލް ކޯޓުގައި ނުނިމި އިބްތިދާއީ އަޑުއެހުމުގެ 1105 މައްސަލަ އޮތް އިރު، ޝަރީއަތުގެ އަޑުއެހުމުގެ 594 މައްސަލައެއް އުޅޭކަމަށް ޖޭއެސްސީގެ ރިޕޯޓުން ހާމަވެއެވެ. އަދި ހުލާސާ ބަޔާން ހުށަހެޅުމުގެ 5 މައްސަލައެއް އޮތް އިރު، ހުކުމް ކުރުމުގެ 155 މައްސަލަ އޮތް ކަމަށް ރިޕޯޓުން ހާމަވެ އެވެ.
ޖޭއެސްސީއިން އާންމު ކޮށްފައި ވާ ރިޕޯޓުގައި ކްރިމިނަލް ކޯޓުގައި މަސައްކަތް ކުރަމުން ދާ ފަނޑިޔާރުންގެ ތައުލީމީ ފެންވަރާއި، ތަޖްރިބާގެ ތަފްސީލްވެސް ބަޔާންކޮށްފައި ވެއެވެ.
ޖޭއެސްސީގެ ރައީސް އަދި ސުޕްރީމް ކޯޓުގެ ފަނޑިޔާރު އަބްދުﷲ އަރީފް، މަޖިލިހަށް ފޮނުއްވި ސިޓީއާ ގުޅިގެން ނަޝީދު ވިދާޅުވީ ޖޭއެސްސީގެ ބޭނުމަކީ ރާއްޖެއަކީ އެއްވެސް މައްސަލައެއް ނެތް ގައުމަކަށް ހެދުން ކަމަށެވެ.
