މޯލްޑިވްސް ނޭޝަނަލް ކައުންޓާ ޓެރެރިޒަމް ސެންޓަރ (އެންސީޓީސީ) އިން ބާއްވާ ކައުންޓާ ޓެރަރިޒަމް އަދި އެކްސްޓްރީމިޒަމްއާ ބެހޭ ޓްރެއިނިން ޕްރޮގްރާމެއް މިއަދު ފަށައިފި އެވެ.
ތިން ދުވަހުގެ މުއްދަތަށް ކުރިއަށްގެންދާ މި ޓްރެއިނިން ޕްރޮގްރާމަކީ އެންސީޓީސީ އާއި، ޔޫއެންޑީޕީ މޯލްޑިވްސް އާއި، ޖަޕާނުގެ ސަރުކާރާއި ނާއިފް އަރަބް ޔުނިވާސިޓީ ފޯ ސެކިއުރިޓީއާ ގުޅިގެން ކުރިއަށްގެންދާ ވޯކްޝޮޕެކެވެ.
އިސްލާމިކް މަރުކަޒުގެ ކޮންފަރެންސް ހޯލްގައި ކުރިއަށްދާ މި ޓްރެއިނިން ޕްރޮގްރާމް ފައްޓަވައި ދެއްވާ ވާހަކަދައްކަވަމުން އެންސީޓީސީގެ ޑައިރެކްޓާ ޖެނެރަލް ވަނީ އެފަދަ ވޯކްޝޮޕްތައް ގިނަގިނައިން ބޭއްވުމުގެ މުހިއްމުކަން ފާހަގަކުރައްވައިފަ އެވެ. މިއަދުގެ ފުރަތަމަ ސެޝަނުގައި މި ވޯކްޝޮޕުގައި ބައިވެރިވި ފަރާތްތަކަށް ނާއިފް އަރަބް ޔުނިވާސިޓީ ފޯ ސެކިއުރިޓީގެ ބްރިގޭޑިއާ ޖެނަރަލް، ޑރ. ފަހަދް އަބްދުލްއަޒީޒް ވަނީ ކައުންޓާ ޓެރެރިޒަމް އާއި އެކްސްޓްރީމިޒަމާ ބެހޭގޮތުން ބައެއް ވާހަކަތައް ހިއްސާކުރައްވައިފަ އެވެ.
ޖުމްލަ 62 ބައިވެރިންނާއެކު ފެށި މި ވޯކްޝޮޕްގައި، ސަރުކާރުގެ ފަރާތުން 18 އެޖެންސީ އާއި 9 އެންޖީއޯއެއް ބައިވެރިވެއެވެ.
