މަޝްހޫރު ލަވަކިއުންތެރިޔާ ފްރެޑީ މާކިއުރީގެ ލަވަތަކުގެ ތެރެއިން މިހާތަނަށް އެއްވެސް ގޮތަކަށް އަޑުއިވިފައި ނުވާ ލަވައެއްގެ ތަފާތު ވާޝަންއެއް ބީބީސީ ރޭޑިއޯ 2އިން ފުރަތަމަ ފަހަރަށް ބްރޯޑްކާސްޓްކޮށްފިއެވެ.
"ޓައިމް ވެއިޓްސް ފޮ ނޯ ވަން"ގެ ނަން ދީފައިވާ މި ލަވަ އަސްލު ތައްޔާރުކޮށްފައިވަނީ، 1986 ވަނަ އަހަރުގެ އުފެއްދުމެއް ކަމަށްވާ "ވެސްޓް އެންޑް ޓައިމް މިއުޒިކަލް"އަށެވެ.
އެ ދުވަސްވަރު ރިލީޒްކުރީ މިއުޒިކް ބޭންޑް "ކުއީން"ގެ ތަރި ފްރެޑީގެ އަޑުގެ މައްޗަށް އެތައް ގުނައަކަށް ބެކިންގް ވޯކަލްސް އަޅާފައިވާ ވާޝަންއެކެވެ.
މިފަހަރު ބީބީސީ ރޭޑިއޯ2 އިން ބްރޯޑްކާސްޓްކޮށްފައިވަނީ މި ލަވައިގެ ޕިއާނޯއަކުން ކުޅެމުންދާ ރާގަކަށް ފްރެޑީ ލަވަކިޔަމުންދާ އަޑު އިވޭ ވާޝަންއެކެވެ.
1960 ގެ އަހަރުތަކުގެ ތެރޭގައި މި ލަވަ ލިޔުނު ޑޭވް ކްލާކް ބީބީސީއާއި ވާހަކަ ދައްކަމުން ބުނީ، މި ލަވަ ލިޔުމަށްފަހު ފްރެޑީ ލައްވާ ފުރަތަމަ ފަހަރަށް މި ލަވަ ކިއުއްވީ ޕިއާނޯ ބެކިންގްއާއި އެކުގައި ކަމަށާ، އެފަހަރުވެސް މުޅި ގައިން ހީބިހިނަގައިގެންދިޔަ ކަމަށާ، ހީވީ ޖާދޫއެއްގައި ޖެހުނުހެން ކަމަށެވެ.
ކްލާކަށް މި ވާޝަން ފެނިފައިވަނީ ގެއްލިފައިވާ ބައެއް އުފެއްދުންތައް ހޯދުމަށް 10 އަހަރަށް ދުވަހަށް ދެމިގެންދިޔަ މަސައްކަތުގެ ތެރެއިންނެވެ.
ނުރައްކާތެރި އެއިޑްސް ބައްޔާ ހަނގުރާމަ ކުރަމުންދަނިކޮށް ފްރެޑީ މި ދުނިޔެއާއި ވަކިވީ 1991 ވަނަ އަހަރުއެވެ. މިފަހަކަށް އައިސް ފްރެޑީގެ ނަން އާންމުންގެ ތެރޭގައި ވައިގައި ހިފާފައިވަނީ އޭނާގެ ހަޔާތުގެ މައްޗަށް އުފައްދާފައިވާ ފިލްމް 'ބޮހީމިއަން ރެޕްސަޑީ"އާއިއެކުގައެވެ. އަހަރުގެ އެންމެ ކާމިޔާބު ފިލްމުގެ ގޮތުގައި ގިނަ ބަޔަކު ސިފަކުރަމުން އަންނަ މި ފިލްމުގައި ފްރެޑީގެ ރޯލު އަދާކޮށްފައިވަނީ ޒުވާން ބަތޮލް ރާމީ މަލެކްއެވެ.
