ޕެންޝަން ފަންޑުގައި ހުރި ފައިސާގެ ތެރެއިން، ހައްޖަން ދާން ބޭނުންކުރެވޭ މިންވަރު 50 ޕަސެންޓުން 80 ޕަސެންޓަށް އިތުރުކޮށްފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެ އޮފީހުގެ ތަރުޖަމާނު އިބްރާހީމް ހޫދު ވިދާޅުވީ ހައްޖަށް ގެންދިއުމަށް ކަނޑަަޅާ އަގުގެ 80 ޕަސެންޓް ޕެންޝަން ފަންޑުން ނެގޭ ގޮތް ހެދުމަށް ނިންމާފައިވާ ކަމަށާއި، އެކަން ވަރަށް އަވަހަށް މަޖިލީހަށް ހުށަހަޅުއްވާނެ ކަމަށެވެ.
ހައްޖައް ދިއުމަށް ޕެންޝަން ފަންޑުގައި ހުރި ފައިސާ ބޭނުންކުރާނެ އުސޫލުގައިވާ ގޮތުން، ފަންޑުން ފައިސާ ދޫކުރާނީ އެ އަހަރަކު ހައްޖަށް ގެންދިއުމަށް ކަނޑައަޅާ އަގުގެ ދެ ބައިކުޅަ އެއްބައެވެ.
މި އުސޫލުގައިވާ ގޮތުން ހައްޖަށް ދިއުމަށް ޕެންޝަންގައި ހުރި ފައިސާ ބޭނުން ކުރެވޭނީ އެކައުންޓުގައި 336،000 ރުފިޔާ އަށްވުރެ ގިނަ ފައިސާ ހުރެގެންނެވެ. އަދި މި އަދަދަށް ޕެންޝަން ފަންޑުގައި ފައިސާ ހުރީ 6000 މީހުންގެ ކަމަށް ޕެންޝަން އޮފީހުން ވަނީ ބުނެފައެވެ.
ޕެންޝަން ފަންޑުގައި ހުރި ފައިސާއިން ހައްޖަށް ދެވޭގޮތަށް ހެދުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުފުޅެކެވެ.
