އިންތިގާލީ އިންސާފަކީ ހަމައެކަނި އެމްއެމްޕީއާރުސީ ހިޔާނާތުގައި ތުހުމަތުކުރެވޭ ބޮޑުންގެ އެއްޗެއްތޯ އައްސްވާ ކުރީގެ ނައިބު ރައީސް މުހައްމަދު ޖަމީލް އަހުމަދު ސުވާލު އުފައްދަވައިފިއެވެ.
މުހައްމަދު ޖަމީލް މިހެން ވިދާޅުވެ ކުރެއްވި ޓްވީޓެއްގައި ވަނީ ސަރުކާރަށް 6 މަސް ވީ އިރު ކުރެއްވި މަސަތްކަތްތަކާ މެދު ފާޑު ވިދާޅުވެފައެވެ. އެގޮތުން ޖަމީލް ވަނީ ފުލުހުންނާ ހޯމް މިނިސްޓްރީން ޖަވާބު ދާރީ ކުރުވުމަށް ބާރު ތަކުގެ ބޭނުން ކުރަން ޖެހިފައި ވަނިކޮށް އެކަންތައް ނުކޮށް ރައްޔިތުންގެ ފައިސާ އިސްރާފުކުރަމުން ދާކަމަށް ބުނެ ސަރުކާރުން ދައުލަތް ހިންގަމުންދާ ގޮތާމެދު ފާޑު ވިދާޅުވެފައެވެ.
މީގެ އިތުރުން އެމަނިކުފާނު ވަނީ ރައްޔިތުންނާ ގުޅޭ ތަރައްގީގެ މަޝްރުއޫ ތަކަށް ހަރަދު ނުކޮށް ދައުލަތް ހިންގުމުގެ ހަރަދު ބޮޑުވުމުން، ސަރުކާރުން ވެފައިވާ ވައުދުތަކުގެ ބޭނުމެއް އެބައޮތްތޯ ސުވާލު އުފައްދަވާފައެވެ.
އަދި ސަރުކާރުން ތަރައްގީގެ މަޝްރޫތައް ހިންގާ ސްޕީޑް މަޑުވެ، ރައްޔިތުންގެ އިންތިޒާރުތައް ދިގުވާއިރު، ވަކި ބަޔަކަށް އިންސާފު ލިބުމަކީ އިންތިގާލީ އިންސާފު ގާއިމް ކުރަން ވީ ވައުދުކަމަށް ސަރުކާރުން ދެކެންވީ ސަބަބަކީ ކޮބައިތޯވެސް ޖަމީލް ވަނީ ސުވާލު އުފައްދަވާފައެވެ.
ޖަމީލު މި މޭރުމުން ޓްވީޓު ކުރައްވާފައި ވަނީ ކުރީގެ ނައިބު ރައީސް އަހުމަދު އަދީބުގެ މައްޗަށް ކޮށްފައިވާ ހުކުމްތައް ބާތިލްކޮށް މާދަމާ ބޭސްފަރުވާއަށް ބޭރަށް ދިއުމަށް އަދީބަށް ހުއްދަ ދީފައި ވަނިކޮށެވެ. އަދި އެމްއެމްޕީއާރުސީގެ ހިޔާނާތުގެ 1 މިލިއަން ރުފިޔާ ކުރީގެ ރައީސް ޔާމީނުގެ އެކައުންޓެއްގައި ދައުރުވެފައި ވާކަމުގެ ތުހުމަތުގައި އެމަނިކުފާނުވެސް ވަނީ ޝަރީއަތް ނިމެންދެއް ފުލުހުންގެ ބެލުމުގެ ދަށަށް ގެންގޮސް ދޫކޮށްލާފައެވެ.
