ޔޫތު ލީޑާސް ނެޓްވޯކުގެ މިއަހަރުގެ ދެވަނަ ޔޫތު ލީޑާސް ފޯރަމް މާދަމާރެ ފަށާގޮތަށް ހަމަޖައްސައިފިއެވެ.
މާދަމާރޭ ހުޅުމާލޭ ހުރަވީ ސްކޫލްގައި ބާއްވާ ފޯރަމް ހުޅުވުމުގެ ރަސްމިއްޔާތު ޝަރަފްވެރި ކޮށްދެއްވާނީ ނައިބު ރައީސް ފައިސަލް ނަސީމް ކަމަށް ހޯމް މިނިސްޓްރީން ބުނެއެވެ.
ހޯމް މިނިސްޓްރީން ބުނީ މިފަހަރުގެ ފޯރަމްގައި ކޮލެޖް ޔުނިވަރސިޓީ ތަކުން 150 ދަރިވަރުން ބައިވެރިވާނެ ކަމަށެވެ. އަދި ފޯރަމްގެ ސެޝަންތައް ކުރިއަށް ގެންދާނީ ހުކުރު އަދި ހޮނިހިރު ދުވަހު ކަމަށާއި މިފަހަރުގެ ފޯރަމް އަމާޒު ކޮށްފައި ވަނީ "ތަހައްމަލު ކުރުމުގެ ސަގާފަތް - މުޖުތަމައުގެެ ހަމަޖެހުން" މިޝިއާރުގެ މައްޗަށެވެ. ޝިއާރާ ގުޅުން ހުރި ތަފާތު ހަ ދާއިރާއަކުން ތަޖުރިބާ ލިބިވަޑައިގެން ތިއްބެވި ބޭފުޅުން މައުލޫމާތު ހިއްސާކޮށް، މަޝްވަރާ ކުރުމަށް ހަމަޖެހިފައިވެއެވެ.
މި ފޯރަމުގައި ހޯމް މިނިސްޓަރު އިބްރާން އަބްދުﷲ ސެޝަނެއް ނަންގަވައި ދެއްވާނެ ކަމަށް ހޯމް މިނިސްޓްރީން ބުނެއެވެ.
ޔޫތު ލީޑާރސް ނެޓްވޯކަކީ ޒިންމާދާރު ރައްޔިތުން ބިނާކޮށް ގައުމީ ރޫހާއި އެއްބައިވަންތަކަން ދިރުވަން ޔުނިވާސިޓީ އަދި ކޮލެޖު ދަރިވަރުން އެކުލެވޭ ކައުންސިލެއް އުފެއްދުމަށް އެކުލަވާލާފައިވާ ނެޓްވޯކެކެވެ. މި އެކައުންސިލް އެކުލަވާލެވި މަސައްކަތް ކުރަމުން ދަނީ ހޯމް މިނިސްޓްރީގެ ބެލުމުގެ ދަށުންނެވެ.
ޔޫތު ލީޑާސް ނެޓްވޯކުން ވަނީ މިހާތަނަށް އައްޑު އަތޮޅާއި، ފުވައްމުލަކާއި، ހދ. ކުޅުދުއްފުށްޓާއި، ލ. ގަމާއި، ދ. ކުޑަހުވަދޫއާއި، ގއ.ވިލިނގިލީގެ އިތުރުން ހޯރަފުށީގައި ވެސް ފޯރަމް ކުރިއަށް ގެންގޮސްފައެވެ. އަދި މިއަހަރުގެ ފުރަތަމަ ފޯރަމް ފެބްރުއަރީ މަހު ހޯރަފުށީގައި ވަނީ ބާއްވާފައެވެ.
