އެކަށީގެންވާ ފަރުވާ ދެވެން ނެތުމުން އެމަޖެންސީގައި ހިތަދޫ ރީޖަނަލް ހޮސްޕިޓަލުން އައިޖީއެމްއެޗަށް ފޮނުވި އެއް ދުވަސްވީ ތުއްތު ކުއްޖާ މަރުވީ އައިޖީއެމްއެމްއެޗްގައި ފަރުވާ ދެމުންދަނިކޮށް ކަމަށް އެ ހޮސްޕިޓަލުން ބުނެފިއެވެ.
އައިޖީއެމްއެޗުން މިހެން ބުނެފައިވަނީ އެ ކުއްޖާ މަރުވީ ފުލައިޓްމަތީގައިކަމަށް ބުނެ ބައެއް ފަރާތްތަކުން ދައްކަމުންދާ ވާހަކަތަކާއި ގުޅިގެންނެވެ.
މިދިޔަ އާދިއްތަ ދުވަހުގެ ރޭ ސޯޝަލް މީޑިއާގައި އެންމެ ގަދައަށް ދައްކަން ފެށި ވާހަކައަކީ ހިތަދޫ ރީޖަނަލް ހޮސްޕިޓަލަށް އުފަންވި އުމުރުން އެއް ދުވަހުގެ ތުއްތު ކުއްޖަކަށް ބޭނުންވާ ފަރުވާ އެ ހޮސްޕިޓަލުން ފޯރުކޮށް ނުދެވުމުން، މާލެ ގެނައުމަށް ފްލައިޓްގައި ދަތުރު ކުރަމުން ދަނިކޮށް ފްލައިޓް މަތީގައި ނިޔާވި ވާހަކައެވެ. ސޯޝަލް މީޑިއާގައި މީހަކު ކޮށްފައިވާ ޓްވީޓެއްގައި އެމީހާ ބުނީ، މި ތުއްތު ކުއްޖަކު ނިޔާވީ، ހިތަދޫ ހޮސްޕިޓަލުގައި ވެންޓިލޭޝަން މެޝިނެއް ނެތުމުގެ ސަބަބުން ކަމަށެވެ.
އައިޖީއެމްއެޗުން ވަނީ މި މައްސަލައާ ގުޅޭގޮތުން ޓްވީޓެއް ކޮށްފައެވެ. އައިޖީއެމްއެޗުން ބުނީ، ހޮނިހިރު ދުވަހުގެ ރޭ 10:00 ހާއިރު ކުއްޖާ އައިޖީއެމްއެޗްގެ އެންއައިސީޔޫއަށް ގެނެވިފައިވާ ކަމަށެވެ. ކުއްޖާ އެންއައިސީޔޫއަށް ގެނައި އިރު، ކުއްޖާގެ ބްލަޑް ޕްރެޝާ ރިކޯޑް ނުކުރެވޭ ވަރަށް ދަށް ކަމަށާއި ވަގުތުން ކުއްޖާއަށް ފަރުވާ ދޭން ފެށުނު ކަމަށެވެ.
ސޯޝަލް މީޑިއާގައި މީހަކު ކުރި މި ޕޯސްޓް އާންމުވެ، ރައްޔިތުންގެ ފާޑުކިއުން ހިތަދޫ ހޮސްޕިޓަލަށް އަމާޒުވާން ފެށުމުން، އެ ހޮސްޕިޓަލުން ވަނީ އެ ވާހަކަތައް ދޮގުކޮށް ފޭސްބުކްގައި ޕޯސްޓެއް ކޮށްފައެވެ. އެ ޕޯސްޓުގައި ހިތަދޫ ހޮސްޕިޓަލުން ބުނީ، ތުއްތު ކުއްޖާ ފްލައިޓް މަތީގައި ނިޔާވި ކަމަށް ބުނެ ފަތުރާ ހަބަރު ތަކަކީ ދޮގު ހަބަރުތައް ކަމަށާއި، ހޮނިހިރު ދުވަހުގެ ރޭ 10:20 ހާއިރު ކުއްޖާއަށް ވަނީ އައިޖީއެމްއެޗުން ފަރުވާ ދޭން ފަށާފައި ކަމަށެވެ.
މީގެ އިތުރުން އައިޖީއެމްއެޗުން ބުނީ، އެ ހޮސްޕިޓަލުގައި ފަރުވާ ދެމުން ދަނިކޮށް ކުއްޖާ ނިޔާވީ ހޮނިހިރު ދުވަހުގެ ރޭ 11:25 ހާއިރު ކަމަށެވެ. އަދި މި ހާދިސާ މިނިސްޓްރީ އޮފް ހެލްތުން ތަހުގީގު ކުރަމުންދާ ކަމަށް ވެސް އައިޖީއެމްއެޗުން ބުނެއެވެ.
