މޯލްޑިވްސް ހައްޖު ކޯޕަރޭޝަންގެ އޮޕްރޭޝަން މެނޭޖަރު އަސްލަމް މަގާމުން ވަކިކޮށްފިއެވެ.
'ދަ ޕްރެސް' އިން ކުރި ސުވާލަކަށް ޖަވާބު ދެމުން ހައްޖު ކޯޕަރޭޝަނުން ވަނީ އަސްލަމް މަގާމުން ވަކި ކުރިކަން ކަށަވަރު ކޮށްދީފައެވެ. ނަމަވެސް، އޭނާ މަގާމުން ވަކި ކުރުމާއި ގުޅޭ ގޮތުން އިތުރު އެއްވެސް މައުލޫމާތެއް އެ ކޯޕަރޭޝަނުން އަދި ހާމަ ކޮށްފައެއް ނުވެއެވެ.
ހައްޖު ކޯޕަރޭޝަނުން މިކަމާއި ބެހޭ އިތުރު ތަފްސީލެއް ދީފައި ނުވާއިރު، ބައެއް މީޑިއާ ތަކުން ރިޕޯޓްކޮށްފައިވާ ގޮތުގައި، އަސްލަމް މަގާމުން ވަކި ކުރީ، އޭނާ އެ މަގާމުގައި ހުންނަތާ ދެ އަހަރު ފަހުން، ތައުލީމާއި ތަޖުރިބާގެ ޝަރުތުތައް ފުރިހަމަނުވާ ކަމަށް ބުނެއެވެ. އަދި އަސްލަމް މަގާމުން ވަކިކުރުމުގެ ކުރިން އޭނާ އަމިއްލައަށް އެމަގާމުން އިސްތިއުފާ ދިނުމަށް ވަނީ އެދިފައިވާ ކަމަށާއި އޭނާ މަގާމުން ވަކިކުރުމުގެ ކުރިން ވަކިކުރާނެ ކަމުގެ ނޯޓިސްއެއް ދީފައިނުވާ ކަމަށް ވެސް ބައެއް މީޑިއާ ތަކުން ރިޕޯޓްކޮށްފައި ވެއެވެ.
އޭނާގެ ބަަދަލުގައި އެހެން ފަރާތެއް ހައްޖު ކޯޕަރޭޝަންގެ އޮޕްރޭޝަން މެނޭޖަރުގެ މަގާމަށް ހޯދުމަށް ވަނީ އިއުލާން ކޮށްފައެވެ.
