މާލޭގެ މަގުމައްޗަށް ކުނި އަޅައިގެން 17 މީހަކު ޖޫރިމަނާކޮށްފިއެވެ.
އެންވަޔަރަމަންޓް ފުލުހުން އާންމުކޮށްފައިވާ ތަފާސް ހިސާބުތައް ދައްކާގޮތުން، މި މަހުގެ 11 ވަނަ ދުވަހުން ފެށިގެން 17 ވަނަ ދުވަހާ ހަމައަށް 17 ފަރާތެއް ވަނީ ކުނިއަޅައިގެން ޖޫރިމަނާ ކޮށްފައެވެ. ފަހަކަށް އައިސް ކަންމަތިތަކުގައި ކުނި ޖަމާކޮށްފައި ހުންނަ މައްސަލަ ބޮޑުވެ އެކަމުގެ ޝަކުވާތައް އިތުރުވެފައިވެއެވެ.
މިދިޔަ ހަފްތާގައި 17 ފަރާތެއް ޖޫރިމަނާކޮށްފައިވާ އިރު، ރޯދަ މަހުގެ ފުރަތަމަ ހަފްތާގައި، މަގުމައްޗަށް ކުނިއަޅައިގެން ޖޫރިމަނާ ކޮށްފައިވަނީ 3 ފަރާތެކެވެ.
މީގެ އިތުރުން މިދިޔަ ހަފްތާގައި މަގުމައްޗަށް ކުނި އަޅައިގެން ހައްލުނުވި 14 މައްސަލައެއް އެންވަޔަރަމަންޓް ފުލުހުން ވަނީ ފާހަގަކޮށްފައެވެ. ނަމަވެސް ކުނި އަޅައިގެން ހުށަހެޅުނު މައްސަލަތަކުގެ ތެރެއިން 61 މައްސަަލައެއް ފުލުހުން ވަނީ ހައްލުކޮށްފައެވެ.
މަގުމައްޗަށް ކުނި އަޅައިގެން ރޯދަމަހުގެ ފުރަތަމަ ހަފްތާގައި 32 މައްސަލަ ހައްލުނުވާކަމަށް އެންވަޔަރަމަންޓް ފުލުހުންގެ ތަފާސް ހިސާބުތަކުން ދައްކާ އިރު، 36 މައްސަލައެއް ހަލުކުރެވުނު ކަމަށް އެންވަޔަރަމަންޓް ފުލުހުންގެ ތަފާސް ހިސާބުތަކުން ދައްކައެވެ.
މީގެ އިތުރުން ގަވާއިދާ ހިލާފަށް ކުނި ބޭރުކޮށްގެން އަނގަބަހުން 75 މީހަކަށް ވަނީ ނަސޭހަތްތެރިވެފައެވެ. އަދި މަގުމައްޗަށް ކުނި ބޭރުކޮށްގެންނާއި ކުނި އަޅައިގެން 23 ގެއަކަށް އެޓެންޑް ކުރެވުނު އިރު، 26 ފިހާރައަކަށާއި، 10 ކެފޭ ރެސްޓޯރެންޓެއް އަދި 14 ކޮންސްޓްރަކްޝަން ސައިޓެއްގެ އިތުުރުން ދެ އޮފީހަކަށް އެންވަޔަރަމަންޓް ފުލުހުން ވަނީ އެޓެންޑްވެފައެވެ.
